E ta un hilaridad y alaves un tristesa pa lesa e articulo di sra Mervin Ras den cual e parlamentario di AVP aki kier tilda nos di a tira e lucha sagrado di Betico Croes pa nos Status Aparte afor, door cu nos no kier a atende cu e KB di Sint Maarten promer cu atende cu e propio KB di Aruba. Na nos opinion sra Ras ta politicamente completamente perdi ya cu awor enves di a hiba e lucha di Sr Betico Croes na defensa di Aruba ta scohe pa bay trata e lucha di otro Pais. Banda di esaki e ta un tristesa pa mira con sra Ras ta sali defende sr Mike Eman cu asina un fervor, lubidando cu ta hustamente Eman y AVP ta esnan cu tur tempo a bringa contra e idealnan di Betico Croes.

E ta un berguensa berdad pa mira con Mervin awe ta vota pro pa presupuestonan irealistico y ta bati man pa Eman y hasta a bay compania Eman bou di palo den su welga di hamber, siendo cu Eman di 2011 caba a entrega e alma autonomo di e Pueblo aki firmando protocol cu Donner y despues firmando protocol di Diahuebs Santo cu Plasterk na 2013. Aki ta na unda cu Mervin mester a para duro y mustra cu e ta sali na defensa di e Pueblo di Aruba. Pero su oportunismo politico tabata na promer lugar y pesey a bati man na grandi pa Eman lubidando idealnan di Betico Croes y mas principal lubidando e Pueblo di Aruba djies pa complace Eman.

Mester remarca cu Mervin pa falta di argumento y frustracion pa su propio decicionan tuma, awe kier tilda mi persona di ta grita manera alma malo mientras cu tempo cu Betico Croes tabata lider ami y mi famia tabata contra Betico. Esaki ta un otro hilaridad y mas cu claro Mervin ta usa e mentira aki pa por tapa su propio frustracion di ta bin di cuna di MEP, di tabata Presidente di Parlamento tempo di MEP pero awe den AVP no por a haya ningun pocicion di Minister cu a ser priminti na dje y mester keda un simple parlamentario cu e obligacion di defende tur locual Minister Eman bise. Y tur esaki despues cu e mes tabata vocifera constantemente con AVP tabata lastra su persona y hasta a bay asina lew na ofende su mesun famia den Sala di Parlamento.

Lo ta hopi bon si sra Mervin por a keda riba e issuenan politico di interes pa nos Pais y laga e tipo di politica aki di yora constantemente riba contricante politico un banda. Sra Mervin mester compronde cu dia ela scohe pa join AVP ela laga atras tur diginidad, principio y filosofia politico di Betico, pesey awe e ta e ultimo persona cu por bin tilda otro di a tira e lucha di Sr. Betico Croes afor. Ban spera cu sra Mervin por bay un curso urgente pa e por sinia cu su critica riba MEP no ta yudando, pero hustamente ta cabando cu su carera politico. Pueblo tambe ta conciente cu awe Mervin ta sostene Mike y ta traiciona e lucha di Betico Croes pa oportunismo politico.

9 november 2014

Expresionnan haci den e articulo aki no necesariamente ta refleha opinion di ArenaPoliti.co