“E raport cu e “Comision di CFT di Corsou y Sint Maarten” a traha riba finansa publico di Aruba a wordo trata den parlamento di Aruba, apenas cuatro dia despues cu ela drenta. E reunion a tuma luga di 7 di october 2014. E lider di MEP mes, cu no ta miembro di e comision di Asuntonan Financiero y Economico, a participa na e reunion aki. E lider di MEP mes a haci pregunta y haya contesta di e minister di Finansa. Aparentemente e miembronan di MEP ta falta trabou asina hopi cu nan mes no ta corda ki dia nan a bin traha y ki dia no.”  Asina e lider di e fraccion di AVP, Rene Herdé  a contesta e critica cu no ta pone atencion na asuntonan di Aruba mes y cu na Hulanda si lo a trata e raport di CFT y na Aruba no.

COMISION FIHO
Parlamento conoce un cantidad di comision fiho cu ta trata raport y leynan prome cu nan wordo trata den Reunion Publico. Tur miembro di tur fraccion ta den e comisionnan cu nan mes a scohe p’e. E problema cu tin hopi aña caba ta cu e miembronan di MEP no ta atende e reunionnan aki tampoco. Despues nan ta reclama cu nan no a haya informacion of cu a trata e leynan mucho lihe. E reunionnan di comisionnan ta netamente pa duna tur miembro di parlamento di tur fraccion e oportunidad pa haya tur informacion cu nan tin mester, pa reuni cu expertonan cu ta traha riba e ley of cu tin di haci cu e ley. Tambe ta yama e ministernan concerni mes pa bini parlamento. Pero e miebronan di MEP mes no ta haci uzo di e oportunidadnan aki pa prepara nan mes. Den e caso di e raport di e “Comision di CFT di Corsou y Sint Maarten” riba finansa publico di Aruba, e reunion a awordo yama y tur miembro a haya nan invitacion. Hasta miembronan di Parlamento cu no ta miembro di e comision, manera e lider di MEP mes, a participa na e reunion. Ta zona straño pa tende e lider di MEP y otronan den su fraccion bisa cu no a trata e raport aki y otro asuntonan financiero di nos pais, siendo cu e lider mes tabata den e reunion aki. Fraccion di AVP ta lamenta cu atrobe mester cara e lider di MEP ta ganya. 

Expresionnan haci den e articulo aki no necesariamente ta refleha opinion di ArenaPoliti.co