Ta e momento di Arte y Cultura na Aruba 

Diasabra anochi alrededor di 200 persona a aglomera dilanti un edificio monumental cual ta Nicolaas Store cu ta net dilanti e Murals di AMP, pa presencia un espectaculo di artistanan local. Ataliers 89 a demostra un biaha mas di ta cultiva talento riba un nivel hopi halto manera a keda demostra den e show di moda Opposites Attract.

Tabata obvio cu e tempo a yega pa eleva arte y cultura riba e nivel no solamente den beneficio cultural pero tambe beneficio economico. Esaki ta e momento pa fortifica e combinacion di arte, cultura y turismo, creando e autenticidad. E ta un lucha di hopi aña di e sector di arte aki cu tabata en busca di e sosten cu awor nan a ricibi di Minister Oduber.

Durante varios encuentro por nota cu den e sector priva tin e mesun vision cu e mandatario di cultura cual ta pa crea di San Nicolas e capital di nos herencia cultural. Den esaki tambe e aspecto di mehoracion di nos Producto Aruba unda nos turistanan pero tambe pa nos propio localnan. Durante e discurso di Minister Oduber e la comenta e diferente proyectonan cu ta tumando luga den San Nicolas. Un cu pronto ta inicia ta e mehoracion infrastructural di e caya principal di San Nicolas.

Mas y mas e vision di Minister Oduber ta carga sosten y esaki a keda demostra cu hecho. Ateliers' 89 conhuntamente cu Vibrations Pr a brasa e idea di e mandatario pa haci un show di moda den e centro di San Nicolas. Un evento cu a bira un exito rotundo cu presencia masal di nos local nan cu tambe ta sostene e vision aki. Ta netamente nos local nan ta esnan cu lo bira e vehiculo pa dirigi nos bishitantenan pa bishita San Nicolas pa cera conoci mas di cerca cu nos cultura.  

E sector cultural di nos isla ta contento mirando cu nan ta ricibi oido di funcionarionan mas y mas, stimulando nan y creando un plataforma unda Aruba ta diversificando su mes.

No por keda sin menciona cu cultura y arte tin su beneficionan social unda porfin hobennan awor ta kere mas den nan talentonan.  Esaki ta locual Minister Oduber ta haciendo, ampliando e bista di nos localnan pa nos hobennan por desaroya nan mes riba tur e opcionnan profesional.  

Expresionnan haci den e articulo aki no necesariamente ta refleha opinion di ArenaPoliti.co