Oranjestad – Aruba, 23 November 2015: Dialuna mainta Minister di Finanzas, Angel Bermudez conhuntamente cu specialistanan di Internacional Monetary Funds (IMF) y Banco Central (CBA) a inicia un tayer tocante impuesto. Durante e prome parti di e tayer aki a papia riba reforma fiscal, diferente forma di impuesto cu ta wordo uza den Caribe, iniciativanan di impuesto na nivel internacional como tambe diferente topiconan relaciona cu impuesto riba tereno comercial.

Segun e mandatario, despues cu siman pasa a trata y keda codifica den parlamento e di dos parti di e maneho beneficioso yama tambe ‘begunstigend beleid’, mester sigui expande nos conocemento y tende di diferente experto kico ta e desaroyonan den diferente pais, riba nivel global y tambe den region riba tereno di impuesto.

“Nos mester sa kico ta e movecion nan, con demas pais ta reformando y con nan ta cambiando nan sistema di impuesto. Fuera di esey e ta bon pa nos tambe sa con e desaroyonan tanto economico y social ta bayendo y con nos mes ta desea pa esaki cana den futuro”, asina e mandatario di finanzas a expresa.

Manera e mandatario a indica na varios ocasion Aruba ta conta cu un avalancha di leynan di impuesto. Ta papia aki aproximadamente di mas cu 24 ley di cual tur ta hopi anticua manera nos actual leynan di  invoerrechten, grondbelasting, succesie belasting, overdrachtbelasting, entre otro cu ta data di 1908, pues ta leynan cu tin mas cu 100 aña bieu.

Durante e presentacion, specialistanan di IMF a comparti cu actualmente den nos region ya caba tin12 isla cu a adopta e sistema di “Value Added Tax” (VAT). Segun Minister Bermudez esaki ta un forma di ‘sales tax’ basta complica y cu ta rekeri basta trabou administrativo. “Nos mester wak kico ta nos situacion,  personalmente mi no ta mucho convenci cu e sistema aki por funciona cerca nos aunke cu nan a introduci’e na Curaçao si cu 4 tarifa pero mirando cu Aruba basicamente no tin un produccion interno grandi e lo ta mucho complica pa nos” e mandatario a splica.

Di otro banda, Minister di Finanzas ta kere den un tipo di ‘sales tax’ mas simpel, cu menos trabou administrativo y cu ta mas efectivo pa ehecuta tanto di parti di e comerciante como di parti di e consumidor. Sin embargo e mandatario ta sigur cu e reforma aki ta necesario, principalmente si tene na cuenta e edad di nos leynan di impuesto y e inefectividad cu esaki ta trece cun’e, cu e consecuencia tambe di e falta di cumplimento pa cu e leynan aki.

Minister Bermudez a aclaria cu e manera cu lo reforma nos sistema di impuesto no ta decisivo ainda, pues esey ta punto di discusion. “Nos mester bin cu tur e proposicionnan y a base di e discusionnan cu tur esunnan cu tin conocemento di e materia aki, nos lo por yega na un conclusion riba ki forma di cobramento di impuesto ta optimal pa nos economia, nos comunidad y naturalmente pa nos caha di Gobierno”.

Finalmente e mandatario di finanzas ta satisfecho cu e participacion durante e prome dia di tayer di IMF y tur presente cu a manifesta nan interes den e topico aki di impuesto y cu na mes momento ta den posicion tambe pa hiba e discusionnan aki.

“Tanto den e parti di Gobierno cu presencia di Departamento di Impuesto pero tambe di parti di politica, varios parlamentario tambe tabata presente y mi ta kere cu ta bon pa nan tur tuma nota di e desaroyonan global y regional riba e tereno aki y asina den futuro discusionnan cu nos lo tin pa cu e reforma cu nos tur kier trece, e conocemento t’ey y nos lo por hiba debatenan al caso, cu menos emocion pero si unda cu nos lo por yega na conclusionnan riba kico ta deseabel pa nos pais”, asina Minister Bermudez a expresa.

Expresionnan haci den e articulo aki no necesariamente ta refleha opinion di ArenaPoliti.co