STA CRUZ – Lider di MEP Evelyn Wever-Croes a reacciona riba e polemica cu tin tocante e ABB despues cu Mike Eman a silencia Angel Bermudez y laga Angel Bermudez pasa pa ganjado.

ABB OF BBO?
Aparentemente awor tin confusion ta kiko ta bai bira: ABB of BBO. Minister Angel Bermudez a bisa cu e lo bira un ABB di 7%, pero den seno di gobierno ta trahando riba aumento di BBO y BAZV. Pa Mike Eman aumento di BBO ta mas sensiyo y e ta pensa cu e por pase manera un ladron di anochi den porta di Pasco, sin cu pueblo ta lanta. Pero di otro banda, e ta un humiyacion enorme pa Mike Eman cu a priminti cu e lo elimina BBO, pero a aumenta BBO, a crea un monste rbanda di e BBO cu yama BAZV, y awor ta contempla pa aumenta esaki un biaha mas. E escohencia lo cai riba locual Mike Eman por “sugar coat” mihor, cual di nan e por bende, manipulando mente di hende. Mike Eman no ta pensando riba e bienestar di nos pueblo mas, e ta pensando solamente pa keda na poder, y sigi manipula.

7%
Cualquier cu e escohencia ta, un percentahe di 7% lo ta devastador. Tanten no tin control di prijs y un canasta basico amplia, e tipo di aumentonan aki lo afecta esnan mas vulnerable te den nan weso. Ya caba dia Mike Eman a baha e BBO di 3% pa 1.5% na 2009, ningun hende a sinti e alivio. Despues a hisa e BBO cu 1% den e BAZV na fin di 2014, y esey a dal tur hende duro atrobe, pasobra esey a bin riba e 3% cu ningun hende a sinti cu a baha. Na e momento ey e BBO/BAZV tabata oficialmente na 2.5%, sinembargo e tabata sinti mescos cu 4%.
Na juni 2015 a bolbe his’e cu 1%, y pues e tasa official tabata na 3.5% sinembargo e tabata sinti manera 5%. Y awor ta pensa di redoble ten a 7% Esey lo pone e sinti manera 8.5%.

EMAN TA ENGANJA PUEBLO
Eman a core desmenti cu ABB lo bin, pero Eman ta lubida cu e mes a informa CAFT cu e lo bin cu un ABB cu lo genera 50 miyon EXTRA pa gobierno, y tur hende sa cu gobierno mester di e placa ey pa asina sera e deficit. Eman a hunga un wega di silencia Bermudez, y si minister Bermudez no tuma su retiro den e sigienten dianan, mi tambe ta conbensi cu ta un wega infantil ta wordo hunga cu pueblo.

MEDIDA PA SIGI MALGASTA PLACA
E mas tristo ta cu e medida aki ta basa riba un vision financiero fracasa. Pasobra Mike Eman kier solamente suta pueblo cu medida, pero e no kier baha su gastonan. Hancho pa Eman y su ministernan sigi fiesta, pero smal pa e pueblo cu mester bai paga un BBO, ABB of BAZV di 7%.

VISION DI MEP
Bo no por soluciona e problemanan financiero di henter un pais door di suta e pueblo cu medida. Bo ta soluciona e problemanan ora bo baha bo gastonan di luho. Manda dos minister cas, baha e cantidad di coordinador, stop tanto biahamento y fiestamento, y asina so caba bo ta yega na e 50 miyon cu Eman kier logra cu CAFT. Nos solucion ta corta den gastonan personal di e ministernan, y asina evita mas medida. Esaki ta e solucion mas husto, pasobra pueblo no tin culpa den e deroche di placa cu a tuma lugar den e ultimo 6 anjanan aki, y pues no ta pueblo ta e prome pa paga p’e.

Expresionnan haci den e articulo aki no necesariamente ta refleha opinion di ArenaPoliti.co