Mentira y manipulacion a crusa frontera!  

Un biaha mas a keda demostra e manipulacion y mentira cu ta sali for di boca di Ministro Presidente Mike Eman na momento cu el a tene su discurso di lamento pa Genootschap Nederland Aruba na Den Haag, Hulanda y caminda el a papia di e desigualidad den Reino Hulandes, sin realisa cu e ta autor principal di e desigualdad aki. Aparentemente tur cos a cambia awor ya cu no ta gobierno di MEP tabata tin un relacion malo cu Hulanda, manera Mike Eman semper a venena mente di pueblo cu e mentira aki, pero ta e gobierno di AVP mes!

Yoramento sin fin
Despues di un yoramento sin fin di e historia di Aruba su Status Aparte cu un biaha mas Mike Eman a falsifica, e asunto di e refineria cu a cera na november 2012 bao di su mesun gabinete, e crisis mundial cu tambe a afecta Aruba pero cu a ser demoniza pa AVP contra Gabinete Oduber, e supuesto gran inversionnan miyonario di su gobierno y cu CFT a comproba cu esakinan no a yega ni 1% di e gastonan total, un crecemento economico di 3.5% siendo cu na 2014 esaki tabata apenas 1.2% y un supuesto cifra di desempleo di 6.7% siendo cu bao di e hobennan so esaki ta 28.8%, sr. Eman tabata tin e curashi pa gaba di un reduccion drastico - den un solo biaha - di nos deficit financiero for di 9.7% na 2014 te na un supuesto 3.7% na 2015 y cu e ta lamenta cu Hulanda ta zeur so y no ta contento cu e “gran” logro aki.

Aumento di debe nacional y interes
Tambe el a declara cu Hulanda nunca ta duna un compliment na su persona y su gobierno, pero ta punta dede so. Hecho ta cu durante henter su discurso sr. Eman a papia y usa cifranan solamente locual ta cumbini su persona, ya cu ningun momento so el a papia di e aumento drastico di nos debe nacional y e pago di interesnan astronomico cu ta consecuencia directo di e aumento  di e deficitnan durante henter e periodo di 2010-2015 y cual deficitnan ta suma total na 1.9 biyon florin! Naturalmente e Hulandesnan como  gran ‘rekenmeesters’ no por duna compliment na un persona cu durante e ultimo 6 añanan a desgracia henter un pais creando debenan astronomico y interesnan enorme cu tin cu ser paga. Riba e tabel adhunto por mira cu e deficit financiero na 2015 di Gabinete Eman te ainda ta 12.4% mas halto cu locual Gabinete Oduber a laga atras na 2009. Pero por mira tambe cu nos debenan nacional na 2015 ta 79.9% mas halto cu na 2009 y e pagonan di interes riba e debenan aki na 2015 ta 73.1% mas halto cu na 2009. Mirando tur e cifranan espantoso aki, ta con abo como Prome Ministro lo por desea di haya un compliment di e gobierno Hulandes??



Medidanan cruel
Sinembargo locual sr. Eman den su discurso no a trece padilanti ta con drastico tabata e medidanan cu el a impone riba lomba di pueblo pa supuestamente logra yega na un deficit di 3.7% na 2015. Tambe e no a conta cu den 2014 un suma astronomico di 156.6 miyon florin y na 2015 un suma di 258.9 miyon florin a ser tuma na medidanan cruel y p’asina awe e por gaba cu el a logra reduci e deficit drasticamente den un periodo asina cortico. Tur e gabamento aki a bay a costo di cortamento drastico di subsidio na SABA (cuido di nos grandinan), na SVGA (muchanan special), Casa Cuna, Imeldahof, FMAA (adictonan), FDEC (arte), Arubus, esnan cu ta cobra onderstand. Tambe no mester lubida e aumento di edad di pensioen te 65 aña, tanto di APFA y SVB, cortamento den derecho di e ambtenaarnan, aumento di prima di AOV, AZV, BAZV, pago pa recogemento di sushi, meternan di parkeer etc. Pues un masacre cu a conduci na miseria total den hopi hogar na Aruba, caminda tin 12000 hogar cu no por paga nan cuenta di awa y 8000 hogar cu no por paga coriente. Tur esaki Mike Eman a ‘lubida’ di conta e Hulandesnan presente den sala.
Finalmente, mester considera henter e discurso di Mike Eman na Hulanda como un intento pa un biaha mas manipula mente di esnan presente y alabez un preparacion mental pa cu un posibel medida di parti di gobierno di Hulanda riba Gabinete Eman proximamente.

Expresionnan haci den e articulo aki no necesariamente ta refleha opinion di ArenaPoliti.co