Hasta den tempo di Pasco  

"E dianan aki e miembronan di partido MEP ta cana rond ta parti cuminda den barionan di casnan di pueblo. Bo lo kere cu ta cu un bon intencion nan ta haci'e. E berdad ta cu esaki ta un forma mas pa nan haya chens di parti nan gañamento den pueblo. Hasta den tempo di pasco MEP ta sembra discordia. Pasobra TUR loke nan ta bisa ta gañamento cu nan mes a inventa. Bo lo spera un tiki mas sinceridad, seriedad, honestidad, sentido di amor pa nos pais di nan y un deseo di uni nos pueblo ainda mas. Specialmente den tempo di Pasco. Pero loke bo ta wak di miembronan di partido MEP ta net lo contrario. Pueblo sea adverti!" Asina e lider di e fraccion di AVP a bisa diasabra ora ela wordo yama pa e scucha loke e miembroan di MEP tabata cana papia.

PROGNOSTICO DESASTROSO
Segun e informacion cu ciudadanonan tabata duna, e lidernan y activistanan di MEP tabata purba spanta hende cu e fin di aña aki y comienso di otro aña ta desaster mes lo tin na Aruba. Atrobe nan a ripiti cu trahadornan di gobierno no lo haya indexering, bashi premie, gelijk bedrag y back to school premie otro aña. E mentira aki ya ta conoci: MEP tin añanan ta bisa esey. Pero ta for di aña 2010 ora AVP a drenta gobierno cu trahadornan a haya e aumento di salario cu gobierno di MEP a nenga nan 7 aña largo. MEP tabata bisa pensionadonan di gobierno y ex-maestronan di scol cu nan no ta haya nan prima di fin di aña e aña aki. E realidad ta cu e siman cu ta bin e pensionadonan ta bay cobra nan prima di fin di aña, mescos cu nan a cobra esaki for di 2010 ora gobierno di AVP a subi. E activistanan di MEP tabata na San Nicolas ta bisa hende cu gobierno ta bay sera e Centro Medico y manda tur hende cu ta traha eyden cas. E mentira aki tambe nos a tende mas cu un biaha caba di banda di MEP. Nunca esey a sosode of lo sosode. MEP a bisa hendenan cu e prijs di kipashi ta bay yega 7 florin otro aña y hende no lo por come pan mas. Esaki ta un di e mentiranan cu cada seis luna ta core rond den circulo di MEP.

E discordia cu MEP ta purba crea cu tur e gañamento aki tin un meta: spanta pueblo y crea intrankilidad. Pasobra MEP mes no por contribui cu nada drechi pa crea mas paz y trankilidad den pueblo. Pesey ta den intrankilidad, disturbio, tension y cu intimidacion so MEP kier traha. Ta tristo cu e partido MEP di awe a degenera te na e nivel abou y sushi aki. MEP ta pensa:"Si nos no por yuda crea nada bon, laga nos daña tur loke otro ta haci. E ora pueblo lo pensa cu nan lo ta mes malo cu nos." Pa loke ta ementiranan di MEP, cada uno ya a wordo desenmascara. Cada un di e mentiranan e resulta net lo contrario.

Expresionnan haci den e articulo aki no necesariamente ta refleha opinion di ArenaPoliti.co