ORANJESTAD – Durante e bishita di Minister di Desaroyo Economico, sr. Eugène Rhuggenaath, a haci na Aruba siman pasa, el a expresa no solamente un admiracion grandi pa Prome Minister Mike Eman, pero tambe e maneho di pais Aruba y e liderazgo cu Eman ta tuma riba tereno di sostenibilidad. “Nos kier sigui e ehempel di Aruba,” e mandatario, a expresa.

Na prome luga, e bishita tabata pa e cera conoci cu miembronan di Gabinete Mike Eman, despues cu el a wordo apunta como Minister tres luna pasa. Pero tambe a probecha pa papia riba algun tema di interes comun, y alabes bishita su amigo di algun aña Prome Minister Mike Eman.

Minister Rhuggenaath despues di bishita e haf di container nobo na Barcadera, e tabatin combersacionnan fructifero cu entre otro Prome Minister di Aruba, Mike Eman y Minister Otmar Oduber (Minister di Turismo, Transporte, Sector Primario y Cultura).  

A palabra cu Minister Otmar Oduber pa formula un strategia conhunto cu cual por acerca companianan crucero y asina fortifica e posicion di negociacion di ambos pais. Basa riba e strategia aki ta bay haci un oferta conhunto unda ta reparti incentivonan y mercadeo (entre Aruba y Corsou) y asina por ofrece e companianan crucero un skema di biahe mas interesante. Ademas a papia tocante posibilidadnan pa extende conexionnan entre islanan pa tanto e poblacion local y e turista cu tambe kier bishita y conoce e otro islanan.”Ta bon nos para hunto, ya cu asina nos ta siña di otro y ta mas fuerte para, pa pone e fundeshi pa e colaboracion,” e mandatario a expresa.

E combersacion entre Prome Minister Mike Eman y Minister Rhuggenaath tabata principalmente un encuentro entre dos conoci di hopi aña. Den un ambiente relaha a papia riba diferente topico cu ta relevante pa ambos pais y cu tambe ta conta cu interes personal di ambos mandatario. A wak entre otro desaroyo duradero den cuadro di retonan cu Small Island Developing States (SIDS) lo topa nan mes cun’é. “E parti di sostenibilidad ta algo cu nos ta para p’e na Corsou tambe. Nos a caba di aproba un plan nacional di desaroyo y den dje ta ancra e United Nations Development Goals cu sigur ta un tema cu Prome Minister Eman a pusha y a hiba liderazgo riba e tereno ey pa Aruba. Eynan nos ta mira un area di colaboracion.” Y a agrega cu sigur e trabou cu a wordo haci na Aruba riba tereno di sostenibilidad ta un ehempel cu e kier sigui. “Mi ta kere cu tin area cu nos por bini cu mas solucion pa nos comunidad si nos coopera hunto y den e relacionnan di Reino. Mi kier cana hunto cu Prome Minister Eman pa nos mustra kico tin na oportunidad den un Reino Hulandes.”

Expresionnan haci den e articulo aki no necesariamente ta refleha opinion di ArenaPoliti.co