Savaneta ta hayando su atencion. 

ORANJESTAD – Mescos cu hopi habitante di e bario di Savaneta, Minister di Salud Publico, Cuido di nos Grandinan y Deporte, dr. Alex Schwengle tabata presente na develo di borchi y inicio di construccion di MFA. Ademas di expresa cu e ta hopi contento di wak cu Savaneta ta cuminsa haya e atencion cu e merece, Minister Schwengle ya ta cuminsa pensa di ki manera e tambe por aporta na e servicio y posibilidad pa e bario atraves di e Facilidad Multifuncional (MFA). 

“Como Minister di Deporte mi lo zorg pa bin cu aparatonan deportivo pa e MFA. Nos mester bay regla esey ainda den curso di e aña aki pa otro aña,” a bisa splicando cu esaki no ta solamente na MFA di Savaneta, pero na Centro di Bario di Savaneta. Minister Schwengle a argumenta cu “mester bin un paso mi ta kere cu nos mester sigui pusha pa nos pueblo cana mas y bay haci un tiki mas, no solamente pa nan peso, pero vooral pa drecha nan condicionnan cardiovascular.”

MInister Dr. Schwengle ta elogia e vision di Prome Minister Mike Eman pa bin cu un facilidad multifuncional den cada districto. “MFA ta un centro pa pueblo y mi ta encanta e concepto cu Mike Eman a bin cu ne unda cu bo ta pone un centro multifuncional den pueblo y pa pueblo y unda bo ta laga e hendenan di pueblo mes traha den cada MFA. Mi ta kere esey ta di balora.”

E ta felicita pueblo di Savaneta y ta kere cu lo ta un proyecto hopi bunita. Tambe a probecha pa pidi su conciudadanonan di e bario pa carga un poco pasenshi, pa motibo di e stof aworaki dor di e construccion, pero segun Minister Dr. Schwengle, esaki ta e dolornan cu bo ta pasa aden ora bo ta haci un trabou grandi asina. “Dios duna cu tur cos bay bon, pa otro aña e lo ta cla.”

Por ultimo el a gradici Minister President pa e proyecto, como e motor mas grandi cu ta pusha su creacion, pero tambe a gradici e arkitecto Serge Ivar Thijsen, SOGA tur cu ta contribuyendo pa haci e proyecto aki un realidad.

Expresionnan haci den e articulo aki no necesariamente ta refleha opinion di ArenaPoliti.co