Na inicio di construccion di MFA Savaneta. 

ORANJESTAD – Enfoke di Minister President Mike Eman tabata mas riba e satisfaccion y oportunidadnan cu MFA ta representa pa e bario y tur esnan envolvi, na mommento cu a devela e borchi simbolisando inicio di construccion na Savaneta. El a felicita for di Minister Schwengle y miembronan di oficina di MFA, te na arkitecto, trahadonan di Hulpbestuurskantoor y naturalmente tur e habitantenan di Savaneta y bisindario. E di tres edificio multifuncional ta bay keda cla na mei 2017 y pa semper lo cambia positivamente e servicio publico cu henter e bario ta ricibi.

“Curason ta bati un tiki mas duro pa motibo cu e ta un yiu di Savaneta y e ta sinti cu esaki ta un proyecto cu sigur sigur lo yuda e servicio na Savaneta y e atencion pa nos ciudadanonan,” Premier Eman a bisa di su colega Schwengle momentonan despues cu e ultimo aki tambe a hiba palabra na e acto di develo di e borchi.

Dirigiendo su mes na empleadonan di Hulpbestuurskantoor Savaneta, Prome Minister a bisa: “Pabien! Esaki ta bay bira boso cas nobo caminda tanto e acomodacion unda boso ta bay traha ta bay ta mas atractivo y tambe pa e clientenan cu ta bin, ta bay ta un facilidad cu ta duna e atencion cu e clientenan merece.”

Minister President Eman a duna un palabra di pabien na ir. Ivar Thijzen, tambe un yiu di Savaneta y yiu di Servito Thijsen, kende a disena e bunita edificio. Dichosamente a resulta cu e contratista cu a gana e destaho publico pa construccion di e proyecto, tambe tin lazonan estrecho cu e bario di Savaneta. “Custom Constractors di sr. Javier Larmonie. Nos ta hopi orguyoso cu ta un famia cu tambe ta hopi conecta cu Savaneta y esaki ta haci cu Savaneta ta hopi presente den e proyecto.”

Prome Minister tin un ekipo cu e ta gradici consistiendo di Omar Harms, Sr. Paalman y otro miembronan di MFA cu ta trahando hopi duro pa e proyecto a bira un realidad. Esey ta inclui tambe Jamil Werleman, sin laga afo Anky Vrolijk kende a hunga un papel importante prome cu a asumi responsabilidad nobo den museonan di Aruba. “Hunto nos a pone schouder bou di e un vision pa crea un miho calidad di bida den nos barionan y awe nos ta para na otro inicio di esaki,” Premier Eman a comenta.

Finalmente, pero no menos importante, e mandatario a expresa su sincero pabien na pueblo di Savaneta y na Aruba henter pasobra e facilidadnan aki ta bay crea un espacio hopi comodo pa esnan cu ta busca servicio di Hulpbesturskantoor, ademas di otro entidadnan. “Nos ta hopi orguyoso. Danki na tur esnan cu a traha riba dje. Aruba pabien, Savaneta pabien!”

Expresionnan haci den e articulo aki no necesariamente ta refleha opinion di ArenaPoliti.co