E motibo y condicionnan di re-apertura ta mescos of miho cu na 2011. 

"Den declaracionnan y critica di e partido MEP ya ta tende e buscamento di motibo pa vota contra di e re-apertura di e refineria. MEP ta para den e situacion dificil. No solamente pasobra nan no a spera cu lo logra habri e refineria. Nan a kere cu e no lo a logra y cu nan lo por sigui grita cu mester habri e refineria cu nan mes a yuda sera. Nan intencion tabata puramente politico."  Asina Rene Herde' di AVP a declara e siman aki na prensa. Su splicacion ta loke ta tende mas den pueblo. Den pueblo ta tende cu hasta e re-apertura di e refineria cu lo crea tanto cupo di trabou y lo stimula economia, specialmente di San Nicolas y vecindario, ta wordo critica y trata den forma masha negativo door di lidernan y fanaticonan di MEP. Diripiente hende cu tabata critica AVP di no kier habri e refineria, awor ta critica cu e refineria ta contra di e maneho "berde" di AVP y ta malo pa naturalesa. Cu otro palabra, pueblo mes a wak cu semper MEP ta contra. Kico cu bo haci pa Aruba, MEP ta contra.

CONTRA
Na 2011 niun hende a kere cu un partido lo por tabata contra di e re-apertura di e refineria. MEP a sorprende tur hende cu un set di motibo fofo y nan a vota contra di e re-apertura. E lider di MEP a hasta bandona sala pa no vota. Anto e kier papia di liderazgo? E situacion cu MEP a maniobra su mes aden ta cu e mes un motibo, argumento y condicionnan cu a usa pa habri e refineria na 2011, ta conta pa e re-apertura di e refineria awor na 2016. E mes un condicionnan di belasting. Pero miho condicionnan laboral, di medio ambiente, di uso di tereno y di condicionnan a largo plazo pa Aruba. Ta con MEP ta bay vota na fabor awor, siendo cu nan a vota contra biaha pasa ora e mes un motibonan y condicionnan tabata riba mesa. E inconsecuencia y hipocresia aki ta loke ya pueblo ta mustra riba dje. Pero e realidad ta cu MEP no tin niun tipo di berguensa. Cu cara seco nan lo por vota contra y bolbe inventa excusanan barata pa motibonan politico. E interes economico, e creasion di cuponan di trabou y e mehoracion grandi di entradanan pa nos pais, no ta conta pa MEP. Interes di Pueblo no ta conta pa MEP. Esaki no ta prome biaha cu MEP ta demostra esaki. Den asuntonan manera e rescate di e fondonan di pensioen, e eliminacion di previlegionan pa politiconan, den hacimento di inversionnan pa nos pais y otro temanan, MEP a vota contra pa sorpresa di henter pueblo.

Expresionnan haci den e articulo aki no necesariamente ta refleha opinion di ArenaPoliti.co