Ta e mes un motibonan cu tabata tin na 2011. 

CRECEMENTO ECONOMICO 
Un di e metanan pa haci tur cos cu ta posibel pa bolbe habri e refineria ta e echo cu e refineria tin un impacto grandi riba economia di Aruba. Esaki ta e motibo pakico ya for di 2008 partido AVP a bisa cu despues di eleccion na 2009, lo busca tur forma pa bolbe habri e refineria cu a sera bou di gobierno di MEP. E efecto riba economia cu expertonan ta calcula cu e reapertura di e refineria lo tin ta entre 12-15% di GDP. Esaki ta haci e refineria e didos pilar mas grandi di nos economia despues di turismo. E efecto den aña 2016 ora e parti mas grandi di inversionnan lo wordo haci pa reforma e refineria, lo haci cu e crecemento economico di Aruba lo por ta rond di  6.7%. Si esaki wordo realisa e lo nifica un  porcentahe di crecemento cu ta un di mas halto den mas cu un decada. Pa aña 2017 ora e inversionnan mas grandi ya wordo haci, e efecto lo por ta alrededor di 5.7%.

OTRO EFECTONAN SIGNIFICANTE 
E reapertura di e refineria lo tin mas efecto economico, financiero y social. Entre nan ta cu e lo nifica cu tin mas placa ta drenta Aruba cu ta sali. Specialmente e inversionnan den dollar lo nifica un aumento di divisa stranhero / dollar cu lo fortifica nos florin. Esey lo mehora directamente e balansa economico o sea e balansa entre loke nos ta gasta y loke nos ta gana.
Pa decadanan e economia di Aruba a awordo considera di tin un base mucho smal, cu ta nifica cu nos entradanan ta bini di un sector so. E ultimo añanan esey tabata e sector di turismo. Cu e reapertura di e refineria e base economico di nos pais ta wordo hancha. Aruba no lo depende solamente di turismo mas pa su entrada y cuponan di trabou. E diversificacion di economia aki ta significante. No solamente pasobra e lo genera entrada  y cuponan di trabou den un otro nobo, pero tambe pasobra e ta duna perspectiva pa careranan profesional den sector tecnico. Pa enseñansa tecnico e reapertura ta habri oportunidadnan profesional nobo cu a bay perdi.  

Esakinan ta djis un par di motibo pakico e re-apertura di e refineria ta asina importante. E motibonan aki y otronan, ta pakico semper a busca pa habri e refineria. Apart di esey, e ta duna nos e tempo pa sigui busca otro oportunidadnan pa actividad economico nobo, manera nos a haci e ultimo añanan desde cu e refineria a sera. Expertonan ta confirma den nan analisisnan e motibonan importante pa habri e refineria. E ta nifica cu e escohencia y esfuersonan cu AVP a haci pa habri e refineria sin stop di busca otro alternativanan, tabata e miho strategia. Awor Aruba ta wordo premia pa esaki!

Expresionnan haci den e articulo aki no necesariamente ta refleha opinion di ArenaPoliti.co