Den tur e discucion riba e apertura di e refineria ta bon pa nos para keto un rato na e situacion economico cu nos Pais ta aden. Nos Pais semper a conta cu dos pilar economico, turismo y e refineria. Ora cu Valero a sera na 2013, nos a keda solamente cu turismo como pilar economico pa crea entrada pa nos Pais. Ultimo tempo e pilar economico aki a demostra di no ta asina fuerte mas manera e tabata y e consecuencia nos ta sintie na Aruba. Hopi tienda a sera nan porta, cupo di trabou a bay perdi, benta no ta manera antes, placa no ta circula y e economia ta stanca. No ta pornada cu Banco Central a indica cu e economia di nos Pais den 2015 tabata 0,0. Banda di esaki e realidad ta cu riba nos cabes ta colga cu MEGADEBE cu AVP a logra traha pa cual nos mester por conta cu suficiente ingreso como Pais pa por paga pa esaki. Si nos tin cu conta cu solamente turismo como pilar economico, cu ta brindando menos fuerte, nos no lo yega lew y nos ta wordo exponi na un situacion na unda cu lo bay cobra e Pueblo mas belasting pa por cubri e MEGADEBE aki. Pesey nos no por laga Aruba keda depende di un solo pilar economico.

No por djies elemina un pilar economico
Enbista di e situacion precario aki, ora cu Gabinete Eman a anuncia e decicion pa desmantenla e refineria nos di MEP a para duro pa esaki no pasa, ya cu si bay over na desmantelacion hunto cune ta caba cu tur oportunidad pa Aruba por tin un di dos pilar economico. Si nos no tin algo extra pa lora nos economia, Gobierno lo bay hisa belasting aun mas pa por yega na fondo pa paga pa e MEGADEBE di AVP. Pesey si tin 1 % pa habri e refineria mester explora esaki y no djies bay over na elemina un pilar economico cu ta necesario pa lora e economia di nos Pais.

Upgrader cu menos actividad
Nos di MEP a boga pa reapertura di un refineria, pero locual cu Gabinete Eman a bin cune ta un upgrader. Nos a compronde cu su actividadnan lo ta menos cu locual Aruba a conoce ora cu un refineria tabata activo, pero cune actividad ta wordo crea cu awor aki no tin y cu ta necesario. Pa e situacion economico cu nos ta aden awor aki e upgrader significa cu lo habri cupo di trabou, contratistanan lo haya trabou y San Nicolas tambe lo haya mas actividad economico. Eseynan sigur ta faceta positivo cu nos mester tene cuenta cune, ya cu awor aki ademas di turismo nos no tin nada extra pa lora e economia di nos Pais.

Risico ora Eman negosha
Ta bon si pa nos tene den mente cu MEP, apoya pa un grupo grandi den Pueblo, a logra para e desmantelacion di e refineria. Banda di esaki nos tabata tin collega Glenbert Croes cu a haci e trabou pa habri e portanan na Venezuela pa negocacionnan por tuma lugar. Pero e negosacion y e firma di contractnan mes, ta Minister Eman y su hendenan a hacie. Den e situacion ey claramente Pueblo mester ta conciente cu tin risico ya cu Minister Eman ta bon conoci pa NO ta negosha 100% na interes di e Pueblo di Aruba. Pesey ta na su lugar pa ta critico riba e deal cu Citgo y Valero. Banda di esaki nos mester keda vigila cada paso di Minister Eman y su hendenan den e dealnan aki, ya cu Minister Eman no ta hende pa confia wowo sera. Ma na fin di dia nos mester tene na cuenta cu Aruba no por keda cu un solo pilar economico.


23 september 2016

Expresionnan haci den e articulo aki no necesariamente ta refleha opinion di ArenaPoliti.co