Andin Bikker, lider di Partido Democracia Real, a splica den conferencia di prensa semanal, cu e ta wordo acerca pa hopi comerciante di Caya Grandi pa wak si su fracción por intermedia pa flexibiliza e horarionan cu ta cobra parkeer. 

Pa ilustra kico ta pasando Andin Bikker a bisa cu cu dia nan a introduci esaki lamentablemente e tabata tin kibranto di salud, si no e lo a traha un amienda pidiendo flexibilización riba e horarionan di paga parkeer. 

Comerciantenan den Caya ta bisa cu nan ta haya hopi competencia di negociantenan caminda cu e cliente no tin e obstáculo aki cu tin cu paga parkeer unda nan para auto, y hopi ta keda sin bin den Centro di Caya pasobra si nan tin cu cumpra algo cu costa menos di diez florin, y na n tin cu paga un florin pa parkeo económicamente no tin sinti. 

Comerciantenan ta puntra si gobierno por introduci e ultimo lunanan aki diahuebs, diabierna y diasabra atardi, un free parking pa e ora ey stimula cu e persona por bin cumpra den Caya Grandi. 

Bikker a tira un bista riba articulo 5 inciso 2 unda e minister encarga cu transporte conhuntamente cu minister di finanzas por traha un decreto unda nan por bisa cu diahuebs pa diasabra atardi ta free parking. 

E ora ey full e discusión riba ki ora mester haya parking y cu esaki ta pa contribui na Arubus pa nan por paga e tram, etc, por wordo trece den balanza un rato los di e discusión si mester a bin cu parkeer meters si of no.

Bikker ta haya cu esaki ta un hypersolution cu mester aplaudi, y PDR lo haci preguntanan por durante tratamento di presupuesto, pero kizas awor caba lo haci pregunta por escrito na e ministernan concerni pa wak si mas pronto posible por evalua e opción aki cuta enteramente posible mediante un decreto entre e dos ministernan menciona, pa asina aki por acomoda e comerciantenan di Caya. Na final di dia, gobierno den tur sentido ta beneficia si e ta funciona debidamente den su turn over.

Expresionnan haci den e articulo aki no necesariamente ta refleha opinion di ArenaPoliti.co