ORANJESTAD - Diamars ultimo, fundacion ‘Scol Di Musica’ a ricibi su decreto pa subsidio segun e maneho nobo di subsidio cu a keda implementa e aña aki. Minister di Finanzas, Angel Bermudez conhuntamente cu Minister di Turismo, Transporte, Sector Primario y Cultura, Otmar Oduber a firma e ‘landsbesluit’ pa e fundacion na balor di 1.2 miyon florin. 

Minister Bermudez ta satisfecho cu e trabounan di ‘Coördinatiebureau Overheidssubsidie’ (CBOS), cu ta e oficina encarga cu e maneho nobo pa cu subsidio gubernamental. E mandatario ta splica cu e maneho aki a keda implementa pa asina structura miho e proceso di subsidio na un forma standarisa y uniforme tanto pa Gobierno como pa e instancianan subsidia. 

“E maneho di subsidio cu nos ta trahando cun’e den actualidad ta fiha riba ‘output’. Esaki ta haci cu cada fundacion por maneha e placa cu nan ta ricibi cu mas flexibilidad, semper y cuando nan cumpli cu e metanan di e ministerio concerni”, asina Minister Bermudez a splica. Na mes momento  e mandatario a confirma tambe cu den e dianan venidero lo tin mas fundacion cu tambe lo ricibi nan decreto. 

Entrante 1 di Januari 2016, a keda institui e oficina di ‘Coördinatiebureau Overheidssubsidie’ (CBOS) cu ta encarga pa duna conseho y sosten na e ministerionan, e directivanan di maneho y e instancianan en cuanto e subsidionan di Gobierno. CBOS tambe ta responsabel pa (co)-desaroya, inicia, stipula, controla y evalua financiamento di criterio cu ta dirigi riba ‘output’.

Expresionnan haci den e articulo aki no necesariamente ta refleha opinion di ArenaPoliti.co