Hasta esaki MEP ta contra didje! 

E reforma fiscal cu gobierno ta bay implementa tin diferente meta. Dos di e metanan principal ta pa alivia e peso di belasting di trahadornan. Specialmente esnan cu un entrada abou. E didos meta importante ta cu e reforma di nos sistema di belasting mester haci'e mas atractivo pa inverti na Aruba. E efecto di tur dos e metanan aki ta cu nan lo stimula crecemento economico directamente y indirectamente. E reduccion di e peso di belasting riba salario lo haci cu hende ta bay keda cu mas placa. Mas placa den man di pueblo ta nifica cu hende tin mas placa pa gasta y e placa aki den su majoria ta keda aki na Aruba mes. Esaki ta stimula economia.
Un sistema di belasting mas simpel, mas indirecto y cu ta haci Aruba mas competitivo den nos region, ta haci cu mas compania lo bin inverti den nos pais. E placa cu bini di afo, ta drenta nos economia y pon'e crece. Rene Herde': "Nos ta contento cu e sistema nobo di belasting a wordo diseña a base di comparacion cu otro paisnan den region. Esey ta nifica cu a wak con nos ta compara cu otro paisnan. Tambe a wak kico ta e caracteristiconan di e economia di servicio chikito cu nos tin y a busca forma pa elimina e fayonan di e sistema bieuw cu nos tin. Manera e sistema nobo a wordo presenta na nos, ta cu e lo bira mas atractivo pa inversionistanan local y internacional. E ta bay baha e peso di belasting riba majoria di pueblo tambe. Entre otro pasobra ta bay elimina algun tipo di belasting cu ta antigua, tiponan di belasting cu ta rindi poco placa pero cu ta exigi hopi trabou. Ora pone e sistema nobo aki banda di otro cosnan cu ta haci Aruba atractivo pa biba y haci negoshi, manera e trankilidad, e seguridad legal, e opcion extenso pa apela den corte, e amabilidad di nos hendenan y e clima sumamente atractivo, hunto nan ta haci Aruba sumamente interesante pa inverti, pa haci negoshi y pa biba trankilo."

DIRECTO PA INDIRECTO
Loke expertonan di belasting ta boga pe pa hopi aña caba ta un sistema di belasting mas simpel y mas indirecto. Esey kier men cu no ta cobra tanto belasting directamente for di e salario di un hende, pero ta haya e belasting di loke hende cumpra na producto y servicionan. E belasting nobo di ABB cu nan ta propone den e sistema nobo ta simpel y indirecto. Rene Herde':"Esaki ta loke tur experto, comerciante, organisacionnan di consumido y sindicato ta boga pe. Esta pa duna hende e oportunidad pa nan mes dicidi con nan ta usa nan placa enbez di sak'e for di nan salario. Pesey mi a keda asombra cu awor cu porfin ta bin cu e tipo di belasting indirecto, cu no ta cobra belasting for di e salario, cu ta baha e peso di belasting, cu ta elimina algun belasting cu no ta contribui pero si ta molestia, cu e lider di MEP ta yama esaki un medida. Ta esaki su coleganan experto di belasting ta recomenda. Ta esaki ta loke MEP mes a boga pe den y pafo di parlamento. E ta un tipo di belasting cu no ta acumulativo y cu ta causa inflacion manera e BBO cu MEP a introduci. Pero tog e lider di MEP ta yama esaki un medida. Ta con un cambio cu ta beneficia tur hende por ta un medida? Mas ainda ora pueblo ta wak unda su placa ta bay awor, contrario na tempo di MEP. Segun mi MEP ta contra TUR cambio cu ta bon pa nos pais."  Durante di tratamento di presupuesto e tema aki lo wordo ampliamente discuti. E intencion ta pa introduci e sistema di belasting nobo gradualmente. E fraccion di AVP ta boga pa haci esaki mas lihe posibel, pasobra di e bentahanan pa nos economia, creasion di trabou den sector priva y alivio pa tanto empresa como pa pueblo.

Expresionnan haci den e articulo aki no necesariamente ta refleha opinion di ArenaPoliti.co