E zona liber di Aruba tambe tin potencial pa tuma un rol creciente den economia di e isla, p’esey e bishita na Colon, Panama tabata hopi importante pa haya un idea di e desaroyo, reto y trendnan cu tin den e ramo aki pa pues por anticipa nan y busca e oportunidadnan pa crecemento y desaroyo na tempo. Esaki Prome Minister Mike Eman a expresa durante di su bishita na Panama, unda cu el a encabesa un delegacion di Reino Hulandes cu a participa na e conferencia maritimo y actividadnan relaciona cu e conferencia. Lucia White di Freezone Aruba y Jossy Figaroa di APA tambe a participa na e mision economico importante aki.

E mandatario a bishita tambe e area di zona liber di Colon. El a comenta cu e zona liber di e islanan ta mira hopi den direccion di e zona liber di Panama pa siña di loke nan a haci bon y decisionnan cu a resulta menos bon pa nan pa asina e islanan por sigui mehora y perfecciona nan mes.

Eman a splica cu a traha hopi e ultimo añanan riba e proceso cu awo ta bay duna rendimento pa nos pais. A concentra riba e reglanan hopi streng den zona liber pa percura pa Aruba su comercio ta uno integro y ta para pa locual ta mara na dje den tratadonan internacional.

El a bisa cu rond mundo a implementa e reglanan nobo y cada zona liber mester a bay adapta nan comercio na e reglanan. Ta buscando un cantidad di actividad unda transportacion ta huga un rol, pero porta tambe por contribui na añadi un cierto balor na e producto manera ta e caso di Puerto Rico cu ta trece aden producto farmaceutico, ta añadi un balor na dje y ta redestribui e producto den nos region.

Tin oportunidadnan grandi pa engrandece desaroyo di Zona Liber di Aruba. E instancia tin un reputacion halto y a aplica e reglanan nobo hopi bon pa garantisa integridad. Ademas, gobierno ta percurando pa un regimen fiscal nobo y atractivo pa yuda den e desaroyo di Zona Liber, segun Mike Eman.

El a splica cu e cambionan den leynan fiscal ta bayendo parlamento proximamente. E ley ta concerni cierto areanan specifico manera sostenibildad, pa atrae mas inversion den e nichenan di negoshi inclui den e ley. Esaki tambe ta incentivo pa mas negoshi establece na Free Zone Aruba.

Expresionnan haci den e articulo aki no necesariamente ta refleha opinion di ArenaPoliti.co