Rene Herdé (AVP): Innecesario, inefectivo y illegal
Awor Raad van State ta confirma cu e "KB" ta illegal !
Na fin di aña pasa, pa ta exacto dia 28 di december, mi a cualifica e KB cu Gobierno di Hulanda a impone riba Gobernador di Aruba pa no firma e ley di presupuesto 2014, como innecesario, inefectivo y illegal. A dura hopi tempo y henter Aruba a wanta hopi sla duro pa motibo di e KB ey. Pero diabierna pasa, e organo di conseho mas halto di Reino a duna su veredicto: E KB TA ILLEGAL. Gobernador no ta un extension di gobierno di Reino cu mester ehecuta sin mas loke nan dicidi. E ta autonomo. Raad van Advies di Aruba, di Corsow y di Sint Maarten, cada uno riba nan mes a bisa cu un KB di e forma ey ta illegal. Nos a bisa esey y nos a mustra riba e consecuencianan grandi di e KB pa Aruba. Lamentabelmente esey tambe a resulta berdad. Awe nos ta bolbe haya rason: e KB tabata innecesario, inefectivo y illegal.
INNECESARIO
Gobierno Hulandes no tabata di acuerdo cu e maneho financiero di gobierno di Aruba pa recupera for di e crisis, door di stimula economia y crea un desaroyo socialmente y financieramente balansa, teniendo cuenta cu esnan di menos recurso. Pa haci esaki nos a usa placa di pueblo, pasobra niun hende kier a inverti. Gobierno Hulandes ta wak finansa publico den forma isola, mientras cu gobierno y fraccion di AVP, ta wak finansa publico, desaroyo social, economico y laboral como partinan integral di un asunto grandi: bienestar di henter Aruba. Embez di sostene e proceso di sanea organisacion y finansa publico cu Aruba a propone, Gobierno Hulandes a dicidi di pone e KB riba Gobernador pa wanta e presupuesto. A laga CFT envestiga finansa publico. E raport di CFT mes a mustra cu e "KB" tabata innecesario. Loke gobierno Hulandes (y oposicion na Aruba) a kere cu lo sali for di e envestigacion, no a resulta. E mal uso di placa di pueblo pa metanan politico y inversionnan innecesario, no a resulta. Tur loke CFT a analisa y propone ya tabata planea: caba di sanea e fondonan di pensioen y fortifica AZV. Pesey e KB tabata innecesario.
INEFECTIVO
E KB di gobierno Hulandes pa para ehecucion di e presupuesto 2014, tabata tin consecuencianan masha negativo pa nos pais. Gobierno di Aruba cu ta e inversionista mas grandi cu mas cu un biyon florin tur aña den consumo, servicio y infrastructura, no por a haci loke e tabata tin planea. Consumo a baha. Proyectonan pa crea trabou y entrada nobo a sufri tardansa. Companianan priva tambe a sufri di e consecuencianan negativo di e KB. Inversionistanan tabata warda pa wak kico ta bay sosode na Aruba. Esaki a causa tardansa den proyectonan di sector priva. Tur esaki ta mustra cu e KB tabata inefectivo.
ILLEGAL
For di e prome momento expertonan di ley di derecho estatal, profesornan y te hasta ex-minister di Asuntonan di Reino, a bisa cu e "KB" ta illegal. Ta tristo pa wak con enbez di sigui e caminda usual y mas efectivo di dialogo manera semper tabata haci den Reino, gobierno Hulandes a scohe pa viola Statuto di Reino, Constitucion di Aruba y Reglamento di Ordo di Gobernador pa impone un KB. E violacion ta mas grandi ainda, pasobra a viola e autonomia financiero di Aruba cu ta ancra den Statuto di Reino. Awe e illegalidad di e KB ta wordo confirma door di Raad van State na Den Haag, Hulanda. Metanan politico misquino, arrogancia di poder y terkedad, a hiba na e violacion di ley grandi aki, cu a causa tanto daño irreparabel pa nos pais! Awor tin cu wak con pa sigui padilanti.
Expresionnan haci den e articulo aki no necesariamente ta refleha opinion di ArenaPoliti.co