ORANJESTAD- Studianten di IPA, Universidad di Aruba y EPI a reuni siman pasa cu Prome Minister Eman pa intercambia di pensamento, discuti y ricibi informacion balioso pa loke ta e tema sostenibilidad. Trinta studiante, diez di cada instiuto educativo menciona a wordo escogi pa participa den e Green Aruba Conference cu ta start diamars dia 27. Esaki ta di 6 Green Conference cu gobierno di Aruba ta organisa y mescos cu tur aña e espectativanan ta halto. Despues di e encuentro cu Prome Minister e studiantenan a mustra nan satisfaccion di loke nan a tende y con nan ta bay usa e informacion durante e evento di Green Aruba unda nan ta bay fungi como ‘embahadornan’ di Aruba pa guia y informa e participantenan di Green Aruba cu ta bin di exterior.

Studiante di su tercer aña na IPA e cabayero Dijkhoff di 24 aña  a haya e briefing cu Prome Minister a duna masha util. “Nos a haya hopi informacion directamente di Prome Minister. Esaki ta bon, pasobra  e bishitantenan tin oportunidad di haci nos pregunta y cu e informacion adecua cu nos a haya nos por contesta nan di e manera corecto.”  Marilene v.d.Linden di 22 aña y bayendo IPA ta den su di tres aña. Pronto e hunto cu su grupo ta bay core stage na Hulanda y Belgica. Un bon oportunidad pa splica ey tambe di vision 2020 di gobierno di Aruba. “Prome Minister a caba di prepara nos pa Green Aruba cu ta tuma lugar dianan 27 y 28 di oktober. Nos ta bay ta e representantenan di Aruba pa duna guia na e invitadonan di afo. Cualkier pregunta riba tereno di sostenibilidad nos por contesta nan awor despues di e encuentro informativo cu Prome Minister. Nos ta bon prepara pa representa Aruba.” Un otro hoben cu tambe a atende e encuentro cu Prome Minister y ta  bayendo Universidad di Aruba, seccion FEF ta Frances Rodriguez di 26 aña . Un hoben masha entusiasma pa participa den Green Aruba. “Mi a haya e atardi aki masha interesante pasobra mi a siña hopi cos. Mi ta bay cas y splica mi mayornan kico mi a tende, mescos tambe otro hende cu ta busca informacion riba e tema sostenibilidad y vision 2020 di gobierno. Aruba tin hopi di ofrece y esey mi lo conta e participantenan na Green Aruba cu aserca mi pa haya informacion. Mi kier conta nan tambe con bunita y special nos isla ta.” E hobennan bon prepara ta bay haci un bon tremendo trabou. Di esey tur hende por ta sigur. Di e forma aki nan ta pone nan isla briya un poco mas.

Expresionnan haci den e articulo aki no necesariamente ta refleha opinion di ArenaPoliti.co