Na inicio di Aruba Sustainable Week

ORANJESTAD- Aruba Sustainable Week a cuminsa e siman aki cu lansamento di Aruba Learning Event den Marriott Hotel na unda un cantidad grandi di invitado y participante di Green Aruba tabata presente. Entre nan consehero, ministernan di otro isla y paisnan y varios embahador Hulandes.  Apertura di Aruba Learning Event a sosode door di Presidente di Carbon War Room  Jose Maria Figueres, Minister de Meza y Prome Minister Mike Eman.

Eman: “Ta yena nos cu animo di mira cu nos reto y esun di boso ta wordo comparti y sostene pa institucionnan hopi importante den mundo. E hecho cu nos ta para hunto aki awe compartiendo e vision di Aruba y cu  caminda nos dilanti pa cana, no ta solamente pasobra nos tin e compromiso pa haci e isla 100% sostenibel. No, e ta pasobra e soño y ideal aki a wordo gara y comparti cu institucionnan importante cu aunke nos ta un isla chikito mescos cu cualkier otro isla chikito den Caribe y otro parti di mundo no necesariamente ta esnan cu ta sacudi hende pa cambia mundo. Nos reto ta loke cu mundo ta comparti cu nos”.

“Banda di e reto grandi di Aruba, e isla tin tambe un preocupacion profundo cu ta e forsa cu ta guia nos pa logra nos bira 100% sostenibel na 2020.” Eman a bisa cu pasobra e proposito, e reto y e obhetivo di Aruba ta wordo comparti cu asina hopi otro pais, cu e ta hopi orguyoso di por bisa cu Aruba tin tremendo partnernan. Para dilanti un sala yen di hende Prome Minister a haci mencion y a reconoce e trabou magnifico di e partnernan aki. “Jose Maria Figueres, President di Carbon War Room, danki pa bo presencia. Hunto cu Carbon War Room nos por e pone e soño di Aruba su vision riba e agenda di mundo.” Despues di un aplauso grandi Eman a bisa menciona cu Rocky Mountains Institute tambe ta yuda Aruba den logra su obhetivo. Clinton Global Initiative ta e siguiente partner cu a team up cu e otronan. Tur a wordo aplaudi pa loke nan ta nifica pa Aruba y pa mundo. Aruba ta haciendo hopi riba tereno di sostenibilidad caba, pero falta ainda y esey ta e siguiente reto. Durante e Conferencia di Green Aruba ta bay amplia mas riba e logronan di Aruba y kico tin pa haci e siguiente añanan nos dilanti. Eman a invita tur presente pa bay dal un keiro den e bus cu ta pasa na e diferente proyectonan di sostenibilidad na Aruba.

Expresionnan haci den e articulo aki no necesariamente ta refleha opinion di ArenaPoliti.co