A para bira cu tur dialuna Pueblo ta haya comunicado di prensa pa lesa sea di Fraccion di AVP of di Baba Herde den cual Baba ta busca tur forma pa descredita sea e lider, e parlamentarionan of esnan cu ta sostene partido MEP na e Pais aki. E ta un berguensa pa mira fondonan publico di nos Pais wordo malgasta di e forma aki. Pasobra Pueblo ta paga Fraccion di AVP y Baba Herde pa controla gobierno di Aruba y no pa inventa shisheria riba MEP.

Fraccion di AVP no ta cumpli cu nan trabou
Si Fraccion di AVP a cumpli cu su trabou cabalmente, awe nos Pais mester tabata mihor para. Pero Fraccion di AVP NO ta cumpli cu nan trabou. Y esaki ta documenta tambe ya cu den e rapport di Algemene Rekenkamer Aruba riba e Cuenta Annual di Pais Aruba pa 2013 riba pagina 4, nos por lesa con ARA ta bisa cu “falta di supervicion a traduci su mes den concesuencianan serio pa finanzas di e Pais.” Cu otro palabra ARA ta confirma aki cu debi cu e Fraccion di AVP cu ta forma e mayoria di Parlamento NO ta haci su trabou di controla, e finanzas publico di nos Pais a bay ‘out of control.’ Awor bo por bisami con Pueblo ta paga Fraccion di AVP pa keda sin haci nan trabou? Cu ki cara Baba ta cuestiona presencia di MEP den reunion si e Fraccion di AVP ta presenta na trabou y NO ta traha? 

Instiga enves di controla 
Ta tristo pa mira cu enves cu Baba y su bende ta haci nan trabou di controla Gabinete Eman, bo ta haya nan largo bay ta scirbi articulo y hiba dissertacion den Parlamento netamente pa instiga Pueblo contra MEP. Ta ken no a yega di tende Baba papia riba MEP proof? Ta kende no a mira esnan di Fraccion di AVP lastra e Lider di MEP sin argumento valido? Ta kende no a tende ni mira cuanto mentira Baba y su bende ta trece dilanti cada bes den su afan di desprestigia MEP? Esaki ta locual nos ta yama perde tempo valioso cu por a ser dedica na controla Gabinete Eman cu a redobla nos debe externo, cu a hinca Aruba den problema serio cu Hulanda y cu ta haciendo nos Pueblo dia pa dia mas pober. Enves di instiga Baba y su bende mester percura di haci nan trabou parlamentario di control pa cual nan ta wordo paga.

Argumento enves di shisheria 
Unda cu bo bay Pueblo ta comenta di ta cansa di e manera cu Fraccion di AVP y specialmente Baba ta trece shisheria riba MEP dilanti. Pueblo ta haya cu ta balente placa Baba y su bende ta gana y pa e placa ey nan ta spera di por conta un nivel di debate hopi mas halto y cu hopi mihor argumento cu locual awor ta wordo treci dilanti. Pueblo ta paga Fraccion di AVP y Baba Herde pa controla gobierno, bin cu bon argumento den debate y no pa presenta na trabou pa sinta inventa shisheria riba MEP.


16 december 2015

Expresionnan haci den e articulo aki no necesariamente ta refleha opinion di ArenaPoliti.co