• Proyectonan miyonario di ‘Klinkers’ den cierto barionan y algun caminda pa ‘mustra pueblo unda nan placa ta bay’. College financieel toezicht (Caft) a bari e ponencia aki for di mesa caminda nan a mustra cu menos di 1% di e redoblamento di e debe biyonario, a bay na ‘embeyecemento’. Dus unda e sobra 99% a bay?
  
  
• Enbes di a ‘elimina BBO’, un BAZV a wordo introduci, y ainda falta e impuesto di ABB;
  
  
• Grond-, winst-, overdrachts- y e ‘bank transfer’ belasting a wordo aumenta, hunto cu e introduccion di un ‘Serlimar tax’ y un ‘Aruparking tax’;
  
  
• Prijs di awa y coriente no a baha manera mester tabata ta. Pasobra durante añanan largo e prijsnan a subi substancialmente, pa despues gobierno bin ‘tira algun pinda pa pueblo’ cu e splicacion cu pueblo tambe a haya algo. Un pipita di locual algun mandatario a haya. Ainda falta e claridad den ken a bay cu e US$ 300 miyon den e ‘WEB-hedging’;
  
  
• Si  tuma pueblo haci cu e proyectonan miyonario di ‘klinkers’ no tabata suficiente, awor pueblo mester a haya un ‘Caminda Scur’ di 750 miyon florin y un otro di 835 miyon florin, mientras cu Aruba ta bancarota.  Un ‘tiki rood’ no a para e gobierno aki pa pone 1.6 biyon florin adicional riba lomba di pueblo y su yiunan. Y pakico? Ah si, pa e comision cu ta wordo paga ‘per direct’;
  
  
• Criminalidad a subi. Atraco arma casi tur dia. Awendia tiramento a bira ‘normal’. Polisnan ta canando awendia cu ‘bullet proof vest’ como parti standard di nan uniform. Pero, segun e gobierno e ta ‘e percepcion di pueblo’ cu Aruba a bira mas insigur;
  
  
• Criminalnan (o recidivistanan) ta sali liber den algun dia despues cu polis a captura nan. Presonan pisa ta huy (of laga liber) for di KIA pa menasa e sociedad. Pero pa para e asunto aki, gobierno no tin placa of atencion. Awor gobierno mester a bay suplica Hulanda pa placa pa KIA y camara di siguridad. Con a para cu ‘op eigen benen staan’ di ex-minister Tico Croes?
  
  
• No tin trabou mes pa esunnan cu ta biba akinan, pero tur dia 1000 permiso ta wordo ‘bendi’ pa trece mas hende for di exterior aki. Negoshi di ‘tramita permiso’ ta lanta manera ‘paddestoel’ den tur bario. Cu esaki ta causa hopi problema social, no ta importa algun ‘Don’ mandatario. Pasobra Aruba su interes, no ta nan interes;
  
  
• E situacion laboral a deteriora hopi. E fenomeno di ‘cheap labor’ a bira e norma. Pa e Arubiano cu no kier traha pa un salario hopi abou, tin 100 hende den rij. Pero enbes di frena e situacion negativo aki, gobierno a stop di publica cifranan oficial y actualisa di desempleo. Banda di esaki el’a crea mas burocracia manera un departamentonan di DAO, DPL y hasta un ‘CITGO helpdesk’. Awendia hende cu ta busca trabou, ta wordo bisa atrobe cu ‘solamente si e registra na e oficina di e minister, e ta haya trabou’;
  
  
• E desempleo en general ta halto, pero mas halto bou di e hobennan. Pero pa e grupo aki, nada ta wordo haci. Cu excepcion di hinca algun di nan den un grupo ‘para-militar’, bou di capa di ‘formacion social’. Hasta na Colombia nan ta bezig di elimina gruponan ‘para-militar’. Pero aki na Aruba algun ta wordo forma. Cu ki intencion? Esaki tambe tabata e forma con Hitler a indoctrina hobennan for di tempran;
  
  
• Sostenibilidad y ‘Green’ ta conta solamente pa duna discursonan elocuente den exterior. Na Corsou, PDVSA a menasa e gobierno cu si e keda insisti riba normanan ambiental, PDVSA lo bandona e isla. Mientras aki na Aruba, PDVSA (CITGO) ta bonbini cu man habri. Pasobra danki na e gobierno (y algun politico di oposicion), algun cupo di trabou lo wordo crea (mayoria pa extranjero atrobe). Bon ‘deal’, pasobra algun politico lo haya un cabay di campaña, pa no lubida e comisionnan lucrativo cu lo wordo paga. Pregunta: E balor di e salud di e pueblo of e calidad di e medio ambiente di Aruba bal menos cu esun di Corsou?
  
  
• Warda 100 aña pa haya un pida tereno of un cas social a bira normal aki na Aruba. Silencioso y structural e situacion aki a wordo crea durante e ultimo añanan. Pa asina haci pueblo bira mas dependiente di e politico tradicional. Awendia pa un ciudadano haya algo, locual e tin derecho riba dje, e tin cu paga algo bou mesa (algun persona femenino, den natura) of e mester bira ‘esclavo’ of chupado di e politico. Tristo!
  
  

Expresionnan haci den e articulo aki no necesariamente ta refleha opinion di ArenaPoliti.co