Perspectiva Independiente without background 001

Ahustacion di medida

Calculator
Siman pasa a sera cu aprobacion di un aumento di 1% di BAZV (Health tax), y un reduccion di 1% di prima di AZV pa trahado. Fraccion AVP a defende e cambio aki, argumentando cu ta algo positivo, mientras cu fraccionnan den oposicion a critica e cambio. Segun fraccion AVP, BAZV ta un bon manera pa yuda cubri gasto di AZV, y hunto cu e rebaho di prima di AZV, e efecto riba poder di compra lo ta minimal. Oposicion ta contra e cambio aki y a reclama e.o. cu AVP a priminti di elimina BBO y awo ta haci’e mas halto cu e tawata ta ora MEP a introduci BBO, si bo conta BBO y BAZV hunto (awo 3,5% compara cu 3% na 2009). PDR y MEP ta considera e cambio iresponsabel, especialmente na e momentonan aki. Tambe a reclama cu e aumento di BAZV lo tuma luga prome cu e reduccion di e prima di AZV.

BAZV=BBO?
Durante un combersacion* cu lider di fraccion di AVP Rene Herdé, ArenaPoliti.co a remarca cu, basicamente, BAZV ta mescos cu BBO. Sr. Herdé no ta di acuerdo cu esey. Durante tratamento di e aumento den Parlamento siman pasa, minister de Meza tambe a expresa cu nan no ta mesun cos.
Banda di e nombernan, un diferencia ta cu BAZV ta un impuesto destina pa AZV mientras cu BBO ta bay den e fondonan general di Gobierno. E structura y forma con e ta wordo cobra, ta mescos cu BBO. E aspecto acumulativo di BBO cu AVP a critica algun aña atras, nan mes a usa ora Gabinete Mike Eman a introduci BAZV. Sr. Herdé a confirma esaki, y a splica cu e decision pa usa e mesun structura di BBO pa BAZV tin como motibo e capacidad di Departamento di Impuesto, cu no lo por ehecuta un sistema adicional actualmente.

Si bo bay bek na e tempo cu AVP a manifesta contra BBO y e campaña na 2009, bo por usa mayoria argumento cu AVP a usa contra BBO, contra BAZV. Despues cu AVP a insisti pa tanto tempo cu nan lo kita BBO, bo por imaginabo cu nan a prefera di usa un otro nomber cu BBO ora cu e situacion financiero y presion di Hulanda a resulta den medida. E escohencia pa haci un medida nobo un health tax, y no aumenta BBO, ta mustra di ta un escohencia strategico; cobra un Pueblo mas pa cubri gasto di salud ta hopi mas facil pa defende, cu un aumento di e BBO cu nan a priminti di lo elimina na 2011. Tambe mester remarca cu BAZV no a wordo introduci pa genera extra fondo pa AZV, pero pa genera fondo pa por reduci loke Gobierno ta duna AZV (landsbijdrage). Un landsbijdrage ta sali for di placa di Pueblo caba. Cu BAZV, Pueblo ta wordo cobra atrobe, y e placa cu Gobierno a ‘spaar’ ta wordo gasta na otro cos.

Aspecto positivo di BAZV/BBO
Tur partido ta di acuerdo cu nos mester bay mas den direccion di impuesto indirecto. Tin bon argumentonan pa esaki. Turistanan, y tambe trahadonan illegal, tur ta paga e impuestonan indirecto aki. E placa cu e 'extra' pagadonan aki ta genera pa caha di Gobierno, mester por alivia un tiki di e peso di impuesto riba ciudadanonan. Esencial den un movecion for di impuesto directo pa impuesto indirecto ta cu, mientras Gobierno(nan) introduci y aumenta impuestonan indirecto, e impuestonan directo baha, pa e ciudadanonan no bay atras financieramente. Ta keda na Gobierno pa ehecuta e alivio ey tambe.

AVP a purba haci esaki door di baha e prima di AZV pa trahado (casi) simultaneamente cu e aumento di BAZV. Mester remarca cu Gabinete Mike Eman I a subi e prima di AZV cu 2% na 2011 (1% pa dunado di trabou + 1% pa trahado). Esey ta nifica cu e reduccion actual di prima di AZV no ta un reduccion real compara cu e aumento di algun aña pasa, mientras cu e aumento di BAZV si ta un aumento real. Y mientras cu e amento di 1% di BAZV ta den e mesun forma cumulativo di BBO, e reduccion actual di prima di AZV no ta acumulativo.

2016: ABB + ….?
Un di e argumentonan contra e aumento (y introduccion) di BAZV ta cu e ta un medida ‘ad hoc’. Entre otro parlamentario Andin Bikker (PDR) a vocifera esaki na varios ocasion. E plan di Gabinete Mike Eman II ta pa reemplasa varios impuesto cu un tipo di Algemene Bestedingsbelasting (ABB). Segun e plan, BBO lo wordo reemplasa. Di BAZV no tin claridad ainda. Durante e mesun combersacion cu sr. Herdé, ela bisa cu si ta p’e, BAZV lo keda existi banda di un ABB, kisas den un forma no acumilativo. Na mesun momento sr. Herdé a laga sa cu Gobierno ta haciendo calculacionnan ainda pa determina cua impuestononan lo por wordo elimina cu introduccion di un ABB, y cua lo mester keda wordo cobra banda di e ABB.
Bandi di e impuestonan aki, un otro impuesto cu Gobierno ta trahando riba dje ta e 'transaction tax', cu lo mester produci fondonan pa inversion pa yuda paga pa proyectonan manera Green Corridor. 

Cu e plan pa reemplasa BBO (y mas impuesto) cu un tipo di ABB na 2016, tecnicamente, AVP por cumpli cu e promesa di elimina BBO, aunke lo ta 5 aña laat (pero na tempo pa un eleccion na 2017). Pa hopi e lo ta too little too late considerando e tardansa, y introduccion y aumento di BAZV den e mesun forma cu BBO.
Cu e posibilidad cu BAZV lo keda existi banda di un ABB, y posiblemente un transaction tax, un pregunta principal ta; Cu cuanto porciento impuestonan directo lo wordo reduci?

Loke tambe falta pa elimina, ta e duda cu tin tocante impuesto den futuro sercano. Consumidornan y comerciantenan no sa cua, con, ni cuanto impuesto lo mester wordo paga. E inseguridad aki por tin un efecto negativo riba nos economia. Gobierno ta papia di diferente posibel plannan pa basta tempo, cu e intencion pa wordo ehecuta riba un termino relativamente cortico. Añadi e presion di Hulanda y "consehonan" di Cft, y cu mas duda bo lo keda.


*Mei 2015

Expresionnan haci den e articulo aki no necesariamente ta refleha opinion di ArenaPoliti.co

7 motibo pa laga Pueblo eligi su Gabinete

Columna Asiento 22 | S01E05 Hopi ciudadano ta na fabor di un cambio den nos sistema democratico cu lo duna Pueblo e poder pa eligi Parlamento y un (minister-)presidente den eleccionnan separa. De...

Sigui lesa...

Inscribi pa ricibi un resumen semanal di e articulonan mas impactante.

 

Contacto

ArenaPoliti.co ta un website di BPS Media

 

Pa tuma contacto of pa manda comunicado:

m[email protected]

 

Advertising:

[email protected]

x

 

Inscribi pa ricibi un resumen semanal di e articulonan mas impactante.