MEP: In Memoriam di Efrain de Kort | Aruba a perde un gran yiu di tera cu a traha incansablemente pa bienestar di henter comunidad
![Efrain01](/images/400x210/Efrain01.jpg)
Efrain de Kort tabata un di e fundadornan di partido MEP na 1971. Na 1973 el a keda postula como Ministro di Finanzas di Antiyas pa MEP. Durante su temporada como Ministro di Finanzas, el a causa un revolucion financiero den Antiyas. Observadornan politico a consider’e como e mihor Ministro di Finanzas cu Antiyas a yega di conoce. E motibonan pa tal consideracion ta lo siguiente:
1. Efrain tabata e autor di Loonbelasting. Un ley cu a produci miyones y miyones di florin cu tabata na interes di tur e islanan. El a risca presenta e ley aki y te cu awe esaki ta un realidad.
2. Na 1973, gobiernonan insular tabata encontra problemanan financiero serio. Efrain a cuminsa studia e problema aki y pronto el a bin cu e solucion. El a aumenta impuesto riba Lago y Shell di tal manera cu Gobierno Insular di Aruba tabata ricibi 28 miyon florin mas cu antes pa aña. Cu e placa aki Gobierno Insular por a financia tur e proyectonan na beneficio di comunidad.
3. Efrain a auspicia y pone fondonan substancial p’asina Aruba por a haya su propio Scol pa Polis y tambe Rechtshogeschool.
Como diputado Efrain tabata encarga cu asuntonan financiero, desaroyo economico, TAV y cuido social. El a haci un trabao valioso y tabata e prome diputado cu tabata entrega e presupuesto di Aruba na tempo of prome cu e tempo stipula. El a percura pa garantiza Aruba un stabilidad financiero y alavez un progreso economico pa e pueblo.
Schouder cu schouder cu Betico Croes, Efrain a forma parti di diferente comision, cualnan a bishita paisnan manera Venezuela, Colombia, Costa Rica, Panama, Socialista Internacional na Inglatera pa hiba e mensahe di e pueblo di Aruba, esta e deseo pa ser liber. Sin duda cu e contribucion di Efrain na e logro di nos Status Aparte tabata inmensamente grandi.
Alavez Efrain tabata forma parti e Comision Financiero 2001-2005 cu mester a inventarisa y cuantifica pa Gabinete Oduber e estado financiero den cual nos pais a ser laga aden na 2001.
Partido MEP ta gradici Efrain de Kort pa tur loke el a haci pa nos pais y pa partido MEP y ta spera cu e lo tin un bunita lugar den Reino Celestial. Cu Efrain sosega na paz den brasa di Señor.
Expresionnan haci den e articulo aki no necesariamente ta refleha opinion di ArenaPoliti.co