Na memoria di Caspar Boekhoudt      

Cu hopi tristesa y sumamente conmovi partido MEP a ricibi e noticia cu un gran Arubiano y baluarte, sr. Caspar Boekhoudt a fayece dia 21 februari ultimo. Caspar tabata para na cuna di nos partido como co-fundador y a aparece riba lista di MEP na 1971, 1973, 1975, 1977, 1979, 1983 y 1985. Durante henter su trayectoria den politica, el a lucha schouder cu schouder hunto cu Betico Croes pa cu e logro di Status Aparte na 1986. Caspar a forma parti di e delegacion di Aruba na e Conferencia di Mesa Rondo na maart 1983. Semper el a demostra su lealtad incondicional na nos partido. Caspar a fungi como Diputado di finansa y turismo den e prome Bestuurscollege di MEP na 1975. Otro funcionnan importante cu el a ocupa tabata miembro di Conseho Insular y miembro di Controlaria General. Su maneho transparente riba tereno financiero a ser marca cu integridad y honestidad. Den MEP el a fungi como tesorero durante varios aña. Tambe Caspar Boekhoudt a forma parti di e comision negociador pa cu reapertura di e refineria Coastal na 1991 y esaki el a haci gratuitamente. Partido MEP ta gradici sr. Caspar Boekhoudt pa e confiansa y tur loke el a haci pa nos pais y nos partido y ta spera cu e lo tin un bunita lugar den Reino Celestial. Tambe na su señora Judy, yiunan y demas famia ta bay nos mas sincero condolencia. Cu Caspar sosega na paz den brasa di Señor. 

Expresionnan haci den e articulo aki no necesariamente ta refleha opinion di ArenaPoliti.co