Finanzas publico no ta mehorando manera cu Minister Eman ta bisa 

For di e cifranan di Banco Central cu a keda publica siman pasa ta resalta cu e debe di nos Pais ta keda crece ‘on the dot’ y ta pasa 4 biyon florin. Esaki ta indica cu e finanzas publico na man di Gabinete Eman ta sigi empeora y no ta mehorando manera cu Minister Eman ta bisa. 

Debe a subi cu 1000 miyon den 3 aña
Banco Central a indica cu faltando e ultimo kwartaal di 2015, e debe di nos Pais ya a yega 3,9 biyon florin. Segun e Banco, na 2011 e debe tabata 2,8 biyon, despues a subi bay na 3,1 biyon na 2012, djey a subi mas na 2013 bira 3,4 biyon y na 2014 a yega 3,9 biyon. Pues den solamente tres aña e debe a crece cu 1000 miyon florin. Formando un debe monstroso asina bo no ta yuda drecha finanzas publico di nos Pais y bo ta hinca bo Pueblo den problema serio.

No a paga AZV
Mester remarca cu den su splicacion di e cifranan te cu e di dos kwartaal di 2015, Banco Central a splica tambe cu den 2015 e placa di BAZV no a wordo pasa na AZV. Asina nos por lesa riba pagina 2 di e Statistical News Release di 13 di januari 2016, ‘there were no transfers made to the General Health Insurance (AZV). Anto remarcabel ta cu ora cu nos a cuestiona e falta di traspaso di e fondo di BAZV pa AZV, e Minister y AZV a sali nenga esaki. Pesey awor cu Banco Central mes ta indica cu no a paga AZV, ta pone den duda locual Minister y AZV mes a declara. Pasobra ki beneficio Banco Central lo tin pa bisa algo cu no ta berdad? Kedando sin paga AZV, Gobierno ta bolbe traha un debe cu e mester bay cumpli cune.

Den 2016 e debe ta pasa 4 biyon
Segun Presupuesto 2016, e debe di nos Pais lo subi cu 103 miyon y lo yega 4.1 biyon den 2016. Pero ya caba CAFT y Raad van Advies a indica cu e presupuesto no ta realistico ya cu gobierno ta presupuesta su entradanan mucho halto. For di e cifranan di Banco Central mes ta bisto e tendencia cu entrada di gobierno ta kedando atras. Den un situacion asina cu gobierno haya menos entrada cu premira, e deficit lo bira mas grandi y probablemente lo mester bay fia mas placa locual na su turno lo pone cu e debe lo bira hopi mas cu 4.1 biyon den 2016.

Solucion pa debe stop di crece ‘on the dot’
E cifranan di Banco Central ta mustra cu e debe di nos Pais ta keda crece ‘on the dot.’ Pa baha e debe creciente aki, Gabinete Mike Eman mester bay cas hunto cu tur su coordinadornan y sponsernan di campania. Gobierno mester por conta cu 7 minister serio cu ta goza di integridad. Fondo publico mester wordo gasta cu prioridad conforme necesidad di Pueblo. Gastonan mester wordo adapta na e desaroyo economico di nos Pais ya cu no ta na Dubai nos ta biba. Y por ultimo mester busca un manera pa refinancia e debe di nos Pais pa asina por crea espacio financiero pa por drecha e finanzas publico di nos Pais.

18 januari 2016

Expresionnan haci den e articulo aki no necesariamente ta refleha opinion di ArenaPoliti.co