ORANJESTAD – Minister di Energia, Ing. Mike de Meza a yega diabierna atardi for di Houston caminda el a tene reunionnan cu, entre otro, directiva di CITGO. E encuentro ta forma parti di e proceso di negociacion pa cu e rehabilitacion y operacion di e refineria na San Nicolas. Minister de Meza a duna di conoce cu e biahe di trabou tabata uno masha satisfactorio den sentido cu a haci avancenan cu ta hiba tur partido mas cerca di firma e acuerdonan final.

Minister de Meza a reuni cu Nelson Martinez, CEO di CITGO caminda a delibera riba e progreso realisa te awo pa tambe defini e siguiente pasonan cu ta bay hiba finalmente na e fecha limite di 31 di maart. E mandatario a califica e ambiente di e encuentronan como uno sumamente positivo. Trabou no ta stop ya cu diasabra ultimo un delegacion di CITGO a yega Aruba pa atende reunionnan importante dialuna. Ta bay sinta na mesa hunto cu delegacion di Gobierno pa traha riba e ultimo detayenan di e Definite Participation Agreement (DPA).

E mandatario Arubiano a splica cu mientras e parti ey di e negociacionnan ta tumando luga, tin varios otro proceso cu canando simultaneamente. Un ehempel ta e negociacion cu Valero, como tambe e leynan cu tin cu bay Parlamento caminda Gobierno ta establece un compania estatal cu ta doño di tur e propiedadnan di e refineria y ta esun cu ta cera un acuerdo cu CITGO y Valero.

Interes di CITGO pa bira operador di refineria na San Nicolas ta keda sumamente halto, segun Minister de Meza. Durante e ultimo reunionnan sosteni, a acorda rapidamente riba mayoria punto cu a toca, mientras cu riba otronan ta deliberando y mester di mas tempo atencion. “Nos ta premira cu e dos luna y mey aki lo ta hopi druk cu trabou,” asina Minister de Meza a indica. “Mester discuti puntonan hopi compleho, pero na final lo ta hopi satisfactorio Aruba.”

Su dilanti e ta wak dos luna di trabounan grandi, algo cu e ta cla p’e manteniendo e obhetivo final semper den bista cu ta un logro grandi pa e pueblo y economia di Aruba. E siguiente paso ta inspeccion y evlauacion detaya di e facilidadnan di e refineria. Pa ehecuta e fase aki CITGO ta bay busca expertonan. Un bes cu acuerdo y protocolnan ta firma, ta cuminsa inmediatamente na cera convenio cu companianan local.

“Den e dos aña nos dilanti nos lo mira hopi actividad riba e tereno di refineria y sigur na San Nicolas, pero tambe na Aruba en general,” asina Minister de Meza a declara. E inversion di CITGO den refineria di Aruba sigur ta alcansa e suma di 1 biyon Dollar cu ta reparti den un Capital Investment destina pa e rehabilitacion di e instalacionnan di e refineria. Otro Capital Investment ta dirigi na e sostene e unidad cu ta percura pa e baha e peso riba medio ambiente y asina tin mas aspecto.

Expresionnan haci den e articulo aki no necesariamente ta refleha opinion di ArenaPoliti.co