Nuebe ministerio ta mas cu shete ora ta trata di e gastonan y peso financiero cu e ta trece cune riba lomba di nos pais y cada cuidadano di nos comunidad. Ta for di e promer aña cu AVP a dicidi amplia e ministerionan di 7 pa 9  nos di MEP a condena e abuso y acto di sinberguensa aki! Es mas hasta propio gobernador a aconseha sr. Eman pa no hasi esaki pero toch a opta pa hasi 2 miembro di partido contento cu posicion di minister ignorando e consecuencia cu esaki lo tin pa pueblo. Den cuadro di esaki nos kier informa pueblo tocante e desaroyo di gastonan cu 9 ministerio bou Gabinete Eman. 

AVP 2010-2013 vs MEP 2009
Pa medio di un analisis hasi di e gastonan di e bureau di ministernan for di tempo cu Gabinete Eman a tuma mando di gobernacion te cu e presupuesto 2016 e ta posibel pa demostra e peso financiero cu gobierno di AVP tin riba lomba di pueblo algun aña caba. Remarcabel ta e hecho cu e cifranan hasta ta indica cu e gastonan di 7 ministernan bou AVP pa e temporada di 2009-2013 caba tawata mustra un aumento. Pa bai mas den detayes e bureau di 7 ministernan di AVP pe temporada menciona a costa aruba un averahe di 42.3 miyon pa aña. Un comparacion hasi entre e periodo aki di gobernacion di AVP y e total di 7 ministerionan di MEP na clausura di su gobernacion na 2009 cual tawata 30.4 miyon ta indica un gasto adicional di 12.3 miyon compara cu na final di 2009! Kiko esaki ta bisabo? Cu for di e momento cu AVP a tuma mando caba a cuminsa na malgasta placa di e cuidadano pagador di belasting! 

AVP 2014-2016 vs MEP 2009 
Pueblo sa na e momentonan aki caba cu AVP ta oportunista. Esei kiermeen cu e sed pa titulo, poder y placa di AVP no a keda te eynan. Na 2013 dos miembro di AVP a persisti pa bira minister y a complace nan ampliando e ministerionan di 7 pa 9. Manera cu nos a reitera na comienso di e comunicado aki den principio hasta gobernador a desanconseha e paso aki pero sr. Mike Eman a scoge pa hasi y deshaci cu placa di pueblo! Den e ultimo añanan cu a pasa (2014-2016)  e cifranan ta indica cu e 9 ministerionan ta costando e pagador di belasting un averahe di 46.7 miyon pa aña. Cu otro palabra 16.2 miyon florin mas comparando cu e 30 miyon di gobernacion di MEP cu 7 minister.

Ta obvio cu e aumento di coordinadornan ultimo tempo a hasi su efecto tambe. Pasobra den e gobernacion di MEP na 2009 bo tawatin un total di 106 coordinador mientras cu actualmente den 2015 nos ta papiando di 338! Obviamente ministernan di AVP falta di capacidad , conocemento pa por opera pero tambe simplemente ta malgasta placa pagando salarionan astronomico sin cu di berdad esaki ta hustifica! Esakinan ta pruebanan palpabel di un Gabinete sin rumbo y iresponsabel cu e maneho financiero di nos pais. E ehempel ariba menciona ta muestra cu 9 ministerio ta keda un peso financiero inhusto riba presupuesto 2016 y lomba di e cuidadano! 

Expresionnan haci den e articulo aki no necesariamente ta refleha opinion di ArenaPoliti.co