Aruba a lucha anjas largo pa e posicion di Status Aparte. Status Aparte tabata e concepto pa Aruba ta “Baas den su mes cas’ y consecuentemente goberna nos mes na bienestar y progreso di Aruba. E anja aki Aruba ta recorda cu ta 30 anja pasa cu Aruba a logra e posicion di Status Aparte den Reino Hulandes. Primeramente un Independencia entrante 1 di januari 1996 unda e status aparte tabata un frase transitorio di dieza anja pa e Independencia. Esaki tabata e logro den prome instancia na 1983. Despues di esaki den decada 90 a bira hopi cla cu Hulanda NO tabatatin intencion di duna e garantianan di Aruba tabata desea pa un Independencia stabiel. Consecuentemente gobierno Oduber forma pa MEP- PPA- y ADN a logra pa ‘scrap’ e fecha di Independencia for di den Statuut y Aruba a keda cu un Status Aparte pa un periodo ‘indefini’ y cu e derecho di autodeterminacion pa pueblo usa na momento cu pueblo ta di opinion cu e mester worde usa. Ora nos referi na e ‘derecho di autodeterminacion’ di Aruba nos mester referi na e prome Conferencia di Mesa Redonda unda despues di un periodo di discussion den Reino y durante cual antes Hulanda no kier a reconoce e derecho di autodeterminacion di e Islanan pero tabatatin e posicion cu ta ‘Antiyas Hulandes’ lo tabatatin e derecho aki locual Aruba a lucha contra y finalmente durante e prome Conferencia di Mesa Redonda porfin Hulanda y henter Reino a reconoce e derecho di autodeterminacion di Aruba.

30 ANJA DI STATUS APARTE !!

E pregunta cu nos pueblo mester hasi cu mes ta ……..Kiko e Status Aparte a trece pa e pueblo di Aruba ? Nos pueblo realmente a progresa riba tereno social-educacional- economico-cultural ? Con nos por huzga esaki debidamente ?? Realmente e gobernacion cu a worde hiba bao di tur dos signature esta AVP y MEP tabata a base di e concepto di ‘good governance’ ? Entodo caso for di un debe nacional cu Aruba a hereda di ‘Antiyas Neerlandes’ di 400 million florin na anja 1986 e debe nacional aki a subi pa 4000 million(4 billion) florin arubiano ( esaki ta sin conta e debenan ainda di e PPP projectonan). Kiko tabata resultado di e 4000 million na debe y tur otro cu a worde gasta durante e 30 anja aki for di nos presupuesto nacional ?? Unda TUR e fondo aki a worde realmente inverti ? Ken realmente a bira mas ‘rico’ durante e prome 30 anja di nos Status Aparte ?? Kiko realmente e pueblo a cosecha durante di e periodo aki ?

Si nos tene cuenta cu Aruba durante 30 anja di nos Status Aparte NO ta cumpli cu e norma di UNESCO cu ta bisa cu minimalmente 6 % di nos entrada nacional e inversion di Aruba ta mas o menos un averahe di 4.5 %. Consecuentemente esaki ta demonstra cu e prioridad di nos gobernantenan berde y geel tabata otro pero NO pa Ensenansa !!

Si nos tene cuenta cu nos grandinan por a bai cu pensioen na edad di 60 anja pero cu esaki a worde cambia pa edad di 65 anja ……realmente nos por bisa cu esaki ta progreso pa e pueblo of e grandinan ?
Si nos tene cuenta cu como resultado di ‘bad governance’ durante di anjas cu accento riba e ultimo seis anja Aruba a kaba di entrega su autonomia/status aparte riba tereno financiero y awor ta worde controla door di un instancia cu jama C.A.F.T. situa na Corsow…..esaki por worde considera progreso ?

Con nos mester huzga e reparticion di e progreso di Aruba durante 30 anja ora nos tin un rapport di ILO di 2005 cu ta bisa e sistema cu Aruba ta usa esta e C.P.I. (Consumer Price Index) ta un sistema cu ta ‘crea pobreza y ta mantene probreza’ esta cu e sistema aki gruponan manera esnan cu tin un salario minimo, pensioen basico, onderstand etc ta ricibi solamente indexering/inflatie SIN un parti di e progreso real y cu ILO a propone pa Aruba evalua introduccion di un sistema cu jama N.A.W.I. (Nacional Average Wage Index) cual sistema ta garantisa tanto indexering cu lo consisti di e ‘inflatie plus parti di e progreso real’. Ningun di e signaturanan cu Aruba a conoce NI geel NI berde NO a dedica atencion na e pregunta aki mes. Ta solamente PPA e prome partido ‘social democrata’ di Aruba ta accentua e necesidad di e discussion aki.

Con nos mester huzga e resultado di nos Status Aparte durante 30 anja …..ora awe majoria fundacion cu ta ejerce trabao di suma importancia cu gobierno no tin tempo pele …..no ta ricibi nan subsidio mas for di gobierno y consecuentemente no por duna e servicio aki tampoco ?

Con nos mester huzga e systema constitucional unda Aruba ta bai eleccion pa elegi su representantenan di pueblo cu na nan turno ta elehi nos gobierno …durante 30 anja nos systema di ‘checks & balances’ realmente a funciona ??????

Aruba a perde su ‘ajudo economico hulandes’ basa riba un acuerdo politico entre Hulanda y Aruba sin cu nos pueblo y e fundacionan no tabatatin ningun contribuiccion den un decision impactante asina ….awe Aruba ta sinta cu e consecuencianan ??

PPA no por a nota cu den otro articulo di otro partidonan politico e preguntanan aki a ricibi e atencion debido cu PPA lo kier duna na nan.

PPA ta di opinion cu celebracion di nos Status Aparte awe 30 anja despues cu nos a logra e posicion constitucional aki ta na su lugar pero na mes momento e preguntanan ‘critico’ con nos mes como gobernantenan a asumi e poder aki tambe mester worde criticamente analisa ……pa nos weita unda lo ta necesario pa adapta nos constitucion, nos funcionamento cu e principionan di ‘good governance’ pero mas ainda con nos ta mejora e ‘mentalidad’ di nos como sociedad cu e principionan di un ‘democracia bibo’ cu respet pa opinion di un y tur !!

Na esaki PPA lo contribui tanto den nos programanan radial como den nos articulonan den prensa local y den nos medionan social. Pa mas informacion ‘This email address is being protected from spambots. You need JavaScript enabled to view it.’ !!

Aruba, 20 di januari 2016
BENNY NISBET,
Lider Politico di PPA

Expresionnan haci den e articulo aki no necesariamente ta refleha opinion di ArenaPoliti.co