Minister Oduber: Carubbian t'ey pa hopi aña mas 

ORANJESTAD (AAN) Diahuebs pasa Carubbian festival a celebra su di prome lustro! Exactamente dia 9 di Juni 2011 Carubbian Festival a start sali cu su prome evento, cual Festival ta un iniciativa di Minister Otmar Oduber cu e vision di haci San Nicolas e centro cultural di Aruba. E idea principal di e Festival ta pa e turistanan sinti e calor y harmonia di nos hendenan y gosa di e ambiente Caribense. Despues di 5 aña San Nicolas ta mira e fruta di e vision aki, cual ya ta ser comenta como un atraccion pa tur esnan cu ta bishita Aruba y tambe nos hendenan local. Un trabou inmenso a ser haci di inicio te cu awo cu Carubbian Festival ta celebra su di 5 aniversario. Pa e celebracion grandi aki Minister Otmar Oduber tabata presente.
E mandatario tabata sumamente contento mirando e apoyo cu e festival aki a carga y e publico grandi cu a sali bin celebra. Minister Oduber ta mira Carubbian como e festival di mas grandi pa San Nicolas cu a dura tambe mas tempo.
Antes mester a percura pa busnan busca e turistanan den e area hotelero pa trece nan San Nicolas. Mientras cu ainda tin busnan disponibel awor mas y mas turista mes ta haya nan caminda pa Carubbian cu nan auto cu nan a huur of cu taxi. Banda di e turistanan cu ta bay presencia e festival hopi ta nos localnan cu ta percura pa t'ey tur diahuebs pa asina disfruta di e variedad grandi di cuminda y producto local cu tin.
Carubbian ta un idea cu a nace 5 aña pasa pero cu awor sigur ta fungi como inspiracion y lo desemboca den e desaroyo pa San Nicolas creando e den e 'Cultural and Heritage City'.
Den e cuadro aki mes tin un cantidad di inversionnan cu ta tumando luga. Minister Oduber ta mustra riba e hecho cu tin ya caba Ministerio di Cultura y Turismo a inverti 15 miyon florin den entre otro e area di Promenade cu ta conociendo un embeyecemento infrastructural,  2 museo cu pa September proximo lo tin apertura oficial, COSECHA cu tambe lo ta habriendo un sucursal den e mesun area aki y asina por sigui menciona... "Tin un gran cantidad di proyecto tumando luga na San Nicolas, pakiko? Paso nos ta sinti cu ta aki ta representa e aspecto cultural di nos isla. Ta asina impactante pa mira con nos bishitantenan por topa cu nos localnan combersa y siña un poco mas di nos isla. Esaki ta locual ta haci Aruba un destinacion unico di cual nos ta." Sr. Oduber ta indica.
E mandatario ta felicita y gradici tur cu a coopera for di e prome dia cu Carubbian Festival a lansa su mes. Tabata tin 3 board cu a sa di dirigi Carubbian, unda cada un a aporta cu nan granito unda awe nos tin un Carubbian cu enberdad ta celebra su prome lustro pero mas cu tur a bira un gran festival manera nos conoce awe. Minister a finalisa gradiciendo cada un cu den un forma boluntario a yuda y tambe na cada un patrocinado priva cu a kere den e proyecto. "Pabien San Nicolas  y Carubbian t'ey pa hopi aña mas!"
Tur diahuebs anochi den e caya principal di San Nicolas tur hende ta keda cordialmente invita pa join in y pasa un rato agradabel den un ambiente unico.

Expresionnan haci den e articulo aki no necesariamente ta refleha opinion di ArenaPoliti.co