Diamars ultimo nos fraccion a entrega un mocion na Parlamento di Aruba p’asina Algemene Rekenkamer por inicia un investigacion di nobo relaciona cu e hedging cu ta costa pueblo miyones di florin tur luna. E biaha aki nos a pidi pa auditoria di gobierno mes haci e investigacion aki pasobra esun di PWC tawata limita y nos fraccion ta desea pa esaki sosode na un manera mas amplio.

Prijs di crudo a baha
E mocion a wordo traha a base di diferente punto di consideracion, entre otro cu prijs di crudo a baha considerablemente sin cu consumidornan di coriente a haya ningun tipo di rebaho. Tambe e hecho cu feitenonderzoek ehecuta no tawata completo y esaki nos por a conclui tambe for di e rapport. Remarcabel ta cu a limita e investigacion den e proceso di hedging y a exclui e rolnan di Utilities N.V y Gobierno mes cual a pone cu esakinan a keda "out of scope". Ademas di esaki e entrevistanan haci tawata solamente cu esnan cu WEB a permiti. Otro punto cu a capta atencion tawata cu no por a verifica e informacionnan financiero. 

Investigacion riguroso
A base di esaki nos fraccion a dicidi cu e proceso di hedging mester wordo investiga mas profundo. Esaki a pone cu den e mocion nos a pidi e posibilidad pa Algemene Rekenkamer inicia un investigacion riguroso. Apesar cu partido AVP a vota contra di esaki, nos no por wordo stroba, pasobra fraccion di MEP riba su mes a manda pidi un investigacion caba. For di medio di comunicacion nos por a compronde tambe cu director di WEB, sr. Boekhoudt lo por wordo retira. Loke ta cuestionabel di esaki ta e echo cu no ta su so por bay. Acaso ta e tawata esun cu a pidi pa stabilisa e prijs di coriente? Con ta bay para cu e Hunta di Comisario cu a causa e desaster aki a base di peticion di Gabinete Eman? Cu otro palabra sr. Eman y sr. de Meza acaso nan si por sink un compania y Aruba haciendo como sifuera nada no a pasa? Esakinan ta punto cu cada un ciudadano mester evalua riba nan mes.

Expresionnan haci den e articulo aki no necesariamente ta refleha opinion di ArenaPoliti.co