Riba peticion di Gabinete Mike Eman II. 

ORANJESTAD – Cu e proposito di familiarisa cu e vision di Gabinete Mike Eman II pa renobacion di Oranjestad y tambe pa wak cu su  mesun wowo kico ta e ambiente y potencial den nos cayanan, a invita Jessica Goldman y Joseph Furst di Goldman Properties pa cana diaranson mainta rond di Oranjestad. E recorido aki tabata guia pa arkitecto Arubiano ir. Raffy Kock kende a splica tocante e historia di areanan manera Rancho, Waf y Lagoen, entre otro. Tambe a papia di e deseonan cu Gobierno tin pa wak henter e region aki di nos isla conoce un renacemento estilo Wynnwood na Miami, caminda ta crea un colaboracion mas fuerte entre comercio, arte y residentenan. 

E iniciativa pa crea un aliansa cu Goldman Properties y Wynnwood BID ta uno cu ta bin for di Prome Minister Mike Eman. Dos aña pasa e mandatario a bishita e districto ‘en vogue’ di Miami y a extende un invitacion pa bin Aruba y wak e posibilidad di haci mescos na Oranjestad y San Nicolas. For di e tempo ey Oficina di Innovacion, bou direccion di Premier Eman ta den contacto cu Goldman y a coordina e bishita na Aruba di e siman aki. Adicional na e recorido, Jessica y Joseph a tene un sesion di ‘brainstorming’ cu Minister President Eman y Minister di Asuntonan Economico, drs. Richard Arends compaña pa nan respectivo ekiponan di trabou. Aki a analisa e situacion y evalua opcionnan. 

Den parti di atardi a organisa un presentacion na sede di Oficina di Innovacion na Kruisweg caminda a invita representantenan di sector bancario y comercial, como tambe e mentenan empresarial hoben pa tende con e proceso ta y kico ta necesario di cada stakeholder. Na final, e audiencia tabata masha motiva y a manifesta nan boluntad pa cuminsa traha pasobra nan ta wak cu loke a sosode na Soho, New York y na Wynnwood, Miami; por bira un realidad na Oranjestad tambe. Continuacion di e esfuerzonan aki ta den man di Oficina di Innovacion.

Expresionnan haci den e articulo aki no necesariamente ta refleha opinion di ArenaPoliti.co