Nos ta consiente cu cada yui ta primordialmente responsabilad di nan mayornan. Pero pa e motibo cu un hoben sin supervision por haye confronta cu e ta bay den mal caminda, e consecuencia ta cu Pueblo tambe lo bay sinti e efectonan. No ta paso ta yui di otro hende nos tin cu lag ‘e pa su cuenta. Paso momento cu e cuminsa comete actonan di ladronicia, ta Pueblo ta bira e victima di ladronicia. Y pesey nos ta kere cu mester invirti mas den supervision despues di scol pa preveni criminalidad. Aki na Aruba tin traimerdia pa alumnonan di klueterschool, basisschool y speciaal onderwijs. Traimerdia ta aloca na 8 diferente localidad riba Aruba. Traimerdia ta cuida e alumnonan di 1:03 te cu 5:30 di atardi y e mayornan tin e espacio pa busca nan yui te cu 5:40 PM. E demanda pa e projecto aki ta grandi, cual ta hasi cu mester bin cu mas localidad pa asina mas hoben por haya guia y no keda sin supervision. Algo positivo cu aña pasa a wordo introduci, ta e traimerdia pa hobennan di scolnan secundario (EPB, MAVO, HAVO y VWO). Esaki tambe ta un projecto cu nos ta sostene pa e por sigui crece. Sinembargo, fuera di traimerdia, mester tene cuenta tambe cu e mayornan cu ta traha warda. Paso tin hopi mayornan soltero cu pa un motibo of otro nan mes ta tata y mama na cas y mester traha warda. Mayornan cu ta traha warda hopi biaha no tin un bon entrada. Y sin nan no tin ayudo familiar y no por paga un kinderopvang pa nan yui, esey ta hasi cu e hoben ey ta un menor di edad sin supervision adecua. Kinderopvang ta caro. Si laga tur e responsabiladad riba e mayornan so, kisas no lo suficiente lo wordo hasi. Pa medio di un subsidio pa kinderopvang door di gobierno, por preveni cu e menornan di edad ta keda sin supervision adecua. E subsidio aki no mester bay necesariamente full riba costo di gobierno. Mayornan ta paga un parti cu ta na nan alcanse y gobierno ta subsidia un parti. Depende di e entrada di mayornan ta calcula e subsidio. Pa e supervision aki traha optimal mester tin un netwerk entre departamentonan di gobierno concerni y kinderopvang, ja cu mester tin control debido cu e hoben ta acudi na e kinderopvang.

Expresionnan haci den e articulo aki no necesariamente ta refleha opinion di ArenaPoliti.co