MEP ta inventa storia y ripiti nan, te kere nan

A bira un custumber cu tur siman e miembronan di partido MEP ta inventa un storia y den dia y simannan despues ta ripiti e mentira cu nan mes a traha bez tras bez. MEP tin un grupo di fanatico y algun grupo completamente liga cu MEP, cu tambe ta sigui ripiti e mes un mentira cu MEP a traha. Algun medio di prensa cu no ta haci niun investigacion y no ta busca drechi, tambe ta cuminsa ripiti e mentira. Poco poco hende ta tende e mentira asina hopi y ta cuminsa kere e mentira. E unico forma pa para e ciclo di ripiticion di mentira aki, ta door di para e mentiranan aki mes ora. Door di contradeci e mentiranan aki mes ora y mustra e berdad bez tras bez, pa hende compronde y kere e berdad. Loke ta lamentabel ta cu hende ta kere mentira mas lihe cu e berdad, pasobra ta facil pa djis bisa cu un hende horta. Specialmente den politica caminda tanto biaha ela sosode. Ta hopi mas dificil pa mustra cu niun hende a horta. Ta mas facil pa bisa cu un hende ta gaña, cu ta pa mustra cu esey no ta berdad.

GAÑADO
E bon ta cu una bez un mentira wordo desenmascara, esun cu a conta e mentira ta perde credibilidad. Hende djis no ta kere mas. Esey ta pasobra e hende di naturalesa ta desconfia hende cu gaña y no ta kere un storia cu a resulta di ta un mentira den pasado.

Esaki ta conta pa e partido MEP. Bez tras bez nan ta inventa storia. Cada bez e storianan aki ta resulta di ta mentira. Tur e storianan cu MEP a inventa den e ultimo cinco aña a resulta di ta puro mentira. Djis corda e storianan di corupcion den e construccion di hospital. Djis corda na storianan di energia barata y cumpradornan di e refineria cu nan a bisa cu nan si tin. Unda nan a keda? Corda e storia cu turismo ta bayendo malo? Danki Dios y danki na e bon maneho cu turismo ta bayendo hopi bon. Pa falta di seriedad den e partido aki, nan ta sigui ripiti e mes un mentiranan sin compronde cu pueblo ya no ta kere nan mas. Pasobra esun cu a conta e storia ya a perde credibilidad. Aparentemente pa MEP esaki no ta problema. Nan ta sigui inventa nan storianan y scucha solamente e gruponan liga na e partido y nan fanaticonan. Loke resto di pueblo ta pensa no ta interesa nan. Nan ta scucha nan fanaticonan ripiti e storianan cu nan mes a traha y kere cu ta henter pueblo ta kere nan. Aparentemente no tin hende den e partido MEP cu ta lanta nan for di e mal soño di mentira cu nan ta pega aden y confronta nan cu e berdad. Esta, cu ni cuanto bo ripiti un mentira, e ta keda mentira.

Expresionnan haci den e articulo aki no necesariamente ta refleha opinion di ArenaPoliti.co