ORANJESTAD -- Corte a dicta veredicto den caso cu mas di 500 mayor a entama contra SKOA pa e asunto di aumento di schoolgeld. Hues a keda du duna e veredicto otro siman, pero a hala e fecha pa awe, diaranson 8 di juli.
Den su veredicto hues ta hopi cla, y ta bisa cu SKOA no por obliga mayornan pa paga e schoolgeld mas halto, y cu SKOA no por usa esaki pa NO inscribi un studiante. Hues mas alew ta pone como condicion cu e mayornan mester cuminsa un 'bodem procedure' dentro di dos siman. Un procedura asina por tuma algun anja pa wordo completa, y pues pa awor te ora bin un veredicto final, SKOA no mag di cobra e schoolgeld ni placa pa airco. 
Segun hues esakinan ta gastonan cu ta Gobierno mester paga, segun nos leynan. Hues a remarca cu mescos cu Gobierno ta paga pa un politico traha den airco, gobierno mester paga pa un mucha haya les den airco. Tampoco SKOA mag nenga ningun studiante pa motibo di pago.
Pero hues a bai mas leew, y a stipula cu mesun reglanan mester conta pa scol publico, pues eynan tampoco por exigi pago di placa di scol of airco.
SKOA por pidi pago si pa actividadnan cu ta cai fuera di e curriculum, por ehmepl pa excursion, sportdag, etc, pero no por obliga mayornan tampoco. Corte a evalua e papel importante cu leerplicht ta hunga den nos ensenjansa, y a yega na e veredicto aki.
Finalmente hues no a laga e minister ileso, pasobra hues a pone den punto 3.3 cu e minister tabata parti di e decisionnan aki y hasta a bai di acuerdo.

500 MAYOR
"Mi kier felicita sr. Luigi Bergen y e 500 mayornan cu a mustra determinacion, y a demostra cu husticia por vence. Nan a wordo stroba, nan a wordo insulta y nan a wordo intimida, pero nan a sigi. Mi ta spera cu nan sigi cu e bodem procedure tambe, manera hues a stipula, y cu esaki inspira mas hende pa lanta para y exigi husticia"

MINISTER MICHELLE HOOIJBOER-WINKLAAR
"E minister a duna un prome declaracion e mesun mainta. Sinembargo tur hende a kere cu e Minister lo a splica con esnan cu SI a paga caba, lo haya nan placa bek, y con e Minister ta bai garantisa cu e scolnan ta bai haya e placa cu nan mester pa habri anja escolar, mirando cu mayornan lo no paga mas. Pero e minister a hasi locual e por hasi bon: mustra con 'wrong and strong' e ta, y cuminsa culpa hende. Michelle Hooijboer-Winklaar ta culpa tur hende, menos su mes. Siendo cu hues mes a pone bon cla cu e minister ta mes of mas culpable den e asunto aki.

DEBATE DEN PARLAMENTO DIA 1 DI APRIL
Y ta tempo pa e cuminsa carga su responsabilidad. Durante un debate bastante fuerte dia 1 di april ultimo den Parlamento, nos a debati riba e tema di schoolgeld di SKOA. MEP  pidi e reunion ey y a splica e minister exactamente locual cu hues a splik'e. Pero e no kier a tende, y awor un hues imparcial a bin bise e mesun cos. Mi ta spera cu e tantisimo coordiandornan cu e minister tin riba payroll por conbense di cambia su actitud: stop di culpa mitar mundo, carga bo responsabilidad y presenta nos e solucion. Aruba merece mihor, mucho mihor cu locual e gobierno aki ta dunando nos pueblo", lider di MEP Evelyn Wever-Croes a duna di conose.

Expresionnan haci den e articulo aki no necesariamente ta refleha opinion di ArenaPoliti.co