Den Haag  - E Green Aruba Pre-event cu a tuma lugar na stadion di ADO Den Haag awe diaranzon 30 di september tabata un exito grandi. Uu publico grandi - principalmente companianan a bin e evento pa ricibi informacion riba e oportunidadnan cu e conferencia Green Aruba cu lo tuma lugar na luna di october proximo na Aruba, ta brinda nan. E evento cu a tuma lugar den e edificio di stadion di ADO Den Haag a conta cu algun oradornan eloquente, entre nan Minister pa Asuntonan Economico Mike de Meza.

Minister Plenipotenciario Alfonso Boekhoudt - como anfitrion di e evento - a yama e publico bon bini. Sr. Boekhoudt a tene un presentacion ariba e oportunidadnan na Latino America, exito y retonan den e industria di turismo. Tambe e mandatario a papia riba e nesesidadnan di Aruba como un "green hub". Sr. Bekhoudt a elabora ariba e facilidadnan actual y e cooperacion cu ta existi entre Gobierno, partnernan di sector priva y companianan di Gobierno.

Minister Mike de Meza a papia ariba e pasonan cu Aruba ta tumanda pa yega na un economia 100 prociento sostenible na 2020. E mandatario a bisa cu Aruba pa otro aña lo logra cu mas cu 50 porciento di energia lo ta duradero, pero cu e reto grandi ta pa logra e trayectoria na cumpli cu e plan pa 2020 e isla ta draai 100 porciento ariba energia sostenible.

Cu Aruba ta brinda hopi oportunidad pa energia duradero a keda demostra den e discurso di CEO di van Pfixx Solar Fons van Pul, cu ta e compania cu a construi e Solar Park na Aereopuerto Reina Beatrix. Un project unico, cu a capta e atencion di mundo, asina sr. Van Pul a bisa durante di su presentacion.
Mart van Bracht di TNO a elabora ariba e cooperacion entre TNO y Aruba, cual cooperacion recientemente a keda prolonga durante di un encuentro especial na TNO. Sr. Van Bracht a bisa cu tur tramitenan ta cla pa cuminsa cu e proyecto di Smart Community. Un bario cu ta funciona como e testcase pa un comunidad sostenible. Tambe sr, Van Bracht a mustra riba e hecho cu desde cu nan a cuminsa cu nan operaciona na Aruba, TNO ta activo den hopi pais den Caribe y Latino-America. Pesey TNO ta positivo y ta kere den e funcion di Aruba como hub pa Latino America
Por ultimo director di Utilities Aruba NV Frank Hoevertsz a bai mas den detayes ariba e expetactivanan di e di seis Green Conference na Aruba. E conferencia ta parti di un siman ariba e topico di sostenibildad. E oradornan cu a confirma na participacion na e conferencia aki ta entre otro Luis Almagro Lemes
Secretario General  di Organisacion di Estadonan Americano (OAS) y Mark Lambrides
Specialista ariba Energia di World Bank.

Aruba un biaha mas durante di e Green Aruba Pre-event a keda reconoci como un pais y un Gobierno cu vision y cu determinacion pa bira un pais cu un economia sostenibel. Esaki tabata e sentimiento comun cu a sobresali durante di tur e presentacionnan awe merdia.

Expresionnan haci den e articulo aki no necesariamente ta refleha opinion di ArenaPoliti.co