Den Haag – Den fin di siman cu a pasa Aruba a tuma un posicion clave na Amsterdam. Ta asina cu diasabra ultimo tabatin e clausura di e celebracion di 200 aña di existencia di nos Reino Hulandes. Na e celebracion tabata presente den nomber di Aruba diferente invitado especial manera gobernador Fredis Refunjol, presidente di Parlamento Marisol Lopez-Tromp, Minister Plenipotenciario Alfonso Boekhoudt & attaché cultural Angelo Tromp.

Despues cu a inicia na 2013 cu e celebracion di Reino Hulandes su 200 aña di existencia, a yega e momento pa claurusa e proyecto aki den fin di siman. Durante di un periodo di 2 aña a tuma lugar diferente evento, manera e inicio di e celebracion den luna di november 2013 na Scheveningen, cual a recorda e yegada di Prins Willem-Frederik, kende lo bira Rey Willem I. Riba e mesun dia ey tambe tabatin un Concierto Royal, unda cu e.o. Alain Clack, Caro Emerald & DataPanik a representa Aruba. E motibo pa clausura e celebracion aki na september 2015 ta e hecho cu riba 21 di september 1815 Prins Willem-Fredreik a ser instala como Rey di e Teritorio Hulandes.

E clausura, cual tabatin como tema "Eenheid in Verscheidenheid" (Unidad den Diversidad), a tuna lugar den e famoso teatro royal "Carré". Dicho evento a conta cu presencia di tanto Rey Willem-Alexander & Reina Máxima, como tambe Prinses Beatrix. Den su funcion di presidente di e Comite di 200 aña di Reino, Ank Bijleveld-Schouten a gradici un y tur cu a contribui na e celebracion historico aki y a menciona tambe Aruba, unda cu SAIL Aruba y e presentacion di "Soldaat van Oranje" tambe a forma parti di e celebracion di 200 aña di Reino Hulandes.

Siguientemente vice-premier Lodewijk Asscher a enfatica cu hunto nos por realisa nos metanan y surpasa tur reto. Finalmente Marifer Aguirre Broca, como presidente di "Kingdom Youth Parliament" & den pasado presidente di Parlamento Hubenil di Aruba, a mustra con diferencia entre ser humano no mester trece divicion, pero mester tin respet pa cada individuo y no yama otro palabranan discriminatorio manera "Macamba" of "Antiyano".

Después di e parti oficial a sigui cu un presentacion cultural ariba Amstel, unda cu e puente monumental "Magere Burg" a forma parti di e escenario. Den e programa aki a tene consideración

cu tur e paisnan den reino, como tambe e desaroyonan cu a tuma lugar durante e ultimo 200 añanan, p.e. abolicion di sclavitud, guerra mundial & emancipacion di e ser femenino. E famoso cantante Hulandes di desendencia Surnameo, esta Ruth Jacott, a canta e bunita cancion "(terug naar de) Kust" cu e imagen di Aruba su Fofoti. Pa e show tabatain banda di Rey Willem-Alexander, Reina Máxima & Prinses Beatrix, mas representante di Cas Real.

Expresionnan haci den e articulo aki no necesariamente ta refleha opinion di ArenaPoliti.co