Rene Herdé (AVP): Conferencia riba clima na Paris a duna resultado cu ta afecta nos futuro directamente
![Herde10](/images/779x490/Herde10.jpg)
IMPORTANCIA PA ARUBA
E importancia di e acuerdo di e conferencia riba clima na Paris ta mas importante ainda pa nos na Aruba. Pasobra e ta afecta futuro di Aruba y di nos tur directamente. Si e temperatura di mundo sigui subi manera e ta haci awor aki, den menos di 25 aña costanan di nos pais caminda tur e hotelnan di nos industria di turismo ta, lo ta bou di awa. Pasobra e aumento di temperatura di mundo cu djis 2 grado mas, lo causa cu e nivel di lama na mundo lo subi permanentemente. Esaki lo aumenta e nivel di lama suficiente pa pone e hotelnan bou di awa. Door di reduci of sikiera controla e temperatura, por limita e subida di e nivel di awa y asina salba parti grandi y importante di nos isla.
BOGA PA ISLANAN
Ta pa e motibo aki tabata asina importante pa Prome Minister di Aruba ta presente na Paris y den nomber di 52 isla manera no, boga y lobby pa yega na e acuerdo cu alfin a logra. Den palabranan di lidernan di e 52 islanan chikito y vulnerabel aki "Si nos mes no boga pa salba nos propio islananan akinan caminda tur e paisnan grandi y poderoso ta, anto ken ta haci'e pa nos?" Pa islanan chikito manera Aruba, e resultado di e conferencia ta un asunto di bida y morto. E 52 islanan chikito rond di mundo a uni den e grupo di SIDS y a resona nan voz durante di e conferencia na Paris. Entre nan tabata e Prome Minister di Aruba y lider politico principal di nos pais, Mike Eman. Ela fungi como un di e voceronan di e grupo di 52 isla. E acuerdo cu e 195 paisnan a yega na dje na Paris, ta duna speransa cu e amenasa di hisamento di e nivel di lama pa e islanan lo wordo kita. E critica di algun figura politico na Aruba, cu Minister Presidente a biaha pa placer y a gasta placa, ta totalmente for di sla. Hobennan di Aruba cu tin cu bida den futuro, mester ta puntra nan mes si e politiconan cu no ta haya e asunto di conctrol di clima importante, ta haya cu futuro di nos pais y nan bida ta importante
Expresionnan haci den e articulo aki no necesariamente ta refleha opinion di ArenaPoliti.co