BENNY SIEVINGER A ADMITI CU EL’A FAYA, KIKO MINISTERIO PUBLICO TA WARDA? 

STA CRUZ – Lider di MEP Evelyn Wever-Croes a reacciona riba Benny Sievinger cu awor a admiti di a parti tereno pa loco, y contra ley.
Awor, despues di 7 anja cu e ta minister, ela bisa cu e no ta di acuerdo cu e ley di ROP y proteccion di medio ambiente, y pesey e no ta tene su mes na e ley. Pesey minister Sievinger lo a regala cantidad di tereno na esnan mas serca di dje. Especialmente su campanjadornan cu a haya miles y miles di kilometer cuadra di tereno hopi valioso na Aruba.
E caso cu a hala atencion ta e caso di construccion den sercania di Bubali Plas, den cual hues a ordena gobierno pa NO otorga e tereno pasobra e ta den un area berde. Cu esaki minister Benny Sievinger a perde mas di 10 caso den poco tempo, cada biaha hues ta bati riba su dede. Pero locual ta mas serio den e caso aki, ta cu minister Sievinger a laga sa cu e no ta di acuerdo cu Bubali Plas mester ta area berde! Segun Benny Sievinger tin suficiente area berde na Aruba caba y pesey Bubali Plas no mester wordo protehi. Ademas, segun Benny Sievinger, no ta naturalesa a forma Bubali Plas, ta hende a traha Bubali Plas.

Na prome lugar e expresionnan aki ta muestra di un persona sin gevoel pa naturalesa, y na di dos lugar, un minister di un gobierno cu a manda nos pais bancarota pa promove energia “berde” un expresion asina ta masha contradictorio.
Cu e expresion di Sievinger, cu e sa masha bon cu el’a faya, y asina a actua contra ley, e caminda ta hancho habri pa Ministerio Publico cuminsa investig’e y persigi’e. Un minister cu ta trapa ley, mester wordo castiga. Especialmente si e minister mes tabata tin den su poder pa cambia e ley, pero pa 7 anja largo NO a traha riba ec ambio di ley. Ta deliberadamente minister Benny Sievinger ta viola ley.
Minister Presidente Mike Eman ta completamente na altura di tur esaki, pero no ta tuma accion. Mike Eman a perde tur clase di autoridad y respet den pueblo, tur hende ta realisa cu e ta un fracaso como lider, pasobra e ta permiti tur hasi kiko cu ta, y e ta aprob’e, basta cu e keda na poder.
“Pa nos esaki a bira dimas. Nos fraccion ya desde 18 januari 2016 a pidi un reunion publico cu minister Benny Sievinger pa atende e violacion di ley y e mal maneho di minister Benny Sievinger. Lamentablemente te dia di awe e reunion no a wordo yama. Nos lo insisti serca presidente di Parlamento pa yama e reunion aki cu urgencia, pasobra e minister mester wordo responsabilisa pa tanto violacion. Y si parlamentarionan di AVP sigi scohe pa protehe minister Benny Sievinger y pa sigi sconde su bagamunderianan, lamentablemente pueblo di Aruba lo tin cu warda un poco mas, te otro anja despues di eleccion pasobra na momento cu MEP drenta gobierno, minister Benny Sievinger lo wordo investiga y persigi cu tur forsa di ley pa tur e corupcion cu ela hasi su mes culpable na dje. Y un conseho ta bai na hefenan di departamento pa nan no ta complice den e corupcionnan aki. Aruba merese mihor, Aruba merese un gobierno mucho mihor cu esun di gabinete Mike Eman”, lider di MEP Evelyn Wever-Croes a duna di conose.

Expresionnan haci den e articulo aki no necesariamente ta refleha opinion di ArenaPoliti.co