Riba e di cuater y ultimo dia di e ‘Green Conference: Where Europe Meets the Americas’, organisadonan a haya hopi importante pa brinda un oportunidad na otro gruponan di nos comunidad pa tambe cera un conexion cu e tema di sostenibilidad. A logra haci esey exitosamente pa medio di un tremendo lectura presenta dor di astronauta Hulandes di ESA dr. André Kuipers. Sala di Renaissance Convention Center a yena diasabra mainta cu e presentacion aki cu a keda ofreci gratis na publico en general, pero particularmente hobennan di nos isla.

“Mi ta haya interesante con e ta splica cu el a bay den espacio, su aventura y e potretnan con el a mustra  con e planeta a cambia, con pa wak e luznan di e ciudad, asina Evita Thodé a comenta. Su ruman muhe, Gabriela a conta cu el a haya hopi bon pa hobennan di Aruba tabatin e oportunidad aki cu no semper ta presenta. Loke a hala mas su atencion ta con for di chikito Kuipers kier a bira astronauta y el a echt bay p’e, pasa dor di tur e cosnan malo. Dus el a wak e como un ehempel di perseverancia y dedicacion na bo meta y soñonan.

Cutur e aspectonan aki di su presentacion, e astronauta, a sa di tuma atencion completo di e hobennan den e sala. Loke a laga atras, ta mensahenan di positivismo, perseverancia, inspiracion, aprecio pa nos medio ambiente y sosntenibilidad. E hunta di e Student Council di Colegio EPI Unit Hospitality tambe a atende e lectura y a sali hopi motiva, apesar di no ta den e mesun liña di nan estudio. “E lectura di Green Conference tabata uno hopi inspirativo. Esaki ta pa habri hende nan wowo y ta consciente di kico bo ta haciendo pa bo mantene,” Thaissa Rodriguez a comenta mientras cu Dexter Laclé a saca e conclusion cu “Going Green ta e direccion cu nos mester bay den dje.”

Camille Angela ta aprecia cu tipo di oportunidad asina ta wordo ofreci na e hobennan di nos isla. “Esaki ta un manera pa mustra bo con e mundo pafo ta. Nan ta duna nos un chens pa wak y purba bay den bon direccion.” Su colega den e grupo, Stephany Wong ta pensa mescos: “Esaki ta un bon oportunidad pa nan habri nan mente y wak cu bo tin cu bay tras di bo soñonan. Esaki ta un oportunidad hopi educacional.”

Presente den grupo tambe tabata un grupo di un 10 persona entre hoben miembro y lidernan di e capitulo local di DeMolay. E organisacion internacional ta forma hoben di 12 pa 21 aña riba tereno di liderazgo. E delegacion a impresiona pa nan presencia profesional y comportacion durante e lectura. Ayrton Reyes, a papia den nomber di su coleganan bisando cu e lectura tabata uno hopi bon cu ta ofrece e hobennan experiencia cu nan ta bay cu n’e y por aplica den futuro. Tambe a papia di con e por inspira nan: “Loke tur hende por saca ta cu nos mester bira mas consciente di kico ta pasa cu nos mundo.”

Tambe  a topa cu un grupo di mucha mas chikito cu ta studiantenan di Colegio Laura Wernet Paskel. Compaña pa juffrouw Mariela Geerman y miembro di comision di mayor, Gaye Dorff, e muchanan a presencia e lectura como parti di un proyecto hopi special cu nan ta trahando riba dje. Juffrouw Geerman a splica cu nan ta pidiendo artistanan local pa pinta un di e potretnan cu André Kuipers a saca di nos planeta for di espacio. Esaki lo sirbi pa un subasta cu cual e scol kier recauda fondo pa construi nan propio biblioteca.

“E lectura tabata hopi informativo, y aunke e muchanan ta chikito, nan a compronde hopi bon e mensahe di bo mester tin balor y gana pa bira un astronauta,” e juffrouw a bisa mientras cu Sra. Dorff a papia di con e muchanan tabata completamente enfoca riba e presentacion di Kuipers. “E muchanan tabata hopi entusiasma, nan a tende cosnan cu nan no tabata sa cu ta bin den ta un astronauta. Nan a keda riba rand di nan stoel for di cuminsamento te final.”

Di su banda, e astronauta a demostra hopi simpatia y carisma prome, durante y despues di su presentacion. El a tuma tur su tempo pa cuminda y combersa cu algun di esnan cu a keda pa saca potret cu n’e y hacie un ke otro pregunta, cu el a contesta cu smaak. Su impresion di con e mainta a bay, tambe tabata uno hopi positivo. “Fantastico,” el a bisa. “Mi ta hay’e leuk pa comparti mi potret cu hendenan. Awor mi ta tende cu e ta un proyecto di un scol y esey ta hustamente loke mi ta busca cu n’e pa nos aprecia y cuida e beyesa di nos planeta. Un iniciativa hopi bunita.”

Dr. André Kuipers a gradua como medico na aña 1987 di Universidad di Amsterdam. Durante su estudio caba Kuipers tabata un investigador scientifico di e ‘Evenwichtsafdeling’ di Academisch Medisch Centrum na Amsterdam. Despues cu el a gradua el a sigui como investigador scientifico pa entre otro Koninklijke Luchtmacht cu enfoke riba ‘ruimteziekte’ y ‘evenwichtsgevoel’. For di 1991 caba, dr. Kuipers tabata ocupa su mes cu preparacion, cordinacion y implementacion di experimentonan pa ESA (Agencia Espacial Europeo). E experimentonan aki a wordo implementa den SpaceLab y e stacio espacial MIR.

October 1998 dr. Kuipers a logra wordo selecciona como astronaut y logra viaha den espacio na dos ocasion. E prome na 2003 y tabata tin un duracion di 11 dia. Na e di dos ocacion, na 2011, dr. Kuipers a keda den espacio, abordo di ISS (International Space Station) pa un total di 6 luna.

Expresionnan haci den e articulo aki no necesariamente ta refleha opinion di ArenaPoliti.co