Mas di 6 luna pasa UPP a manda un set di preguntanan na Minister y na e Hunta di Supervision di HOH riba e supuesto iregularidadnan di cierto specialistanan laborando den HOH, y nunca nan por a duna nos e respet pa sikiera duna nos un contesta.

A scohe pa hunga e wega di haci manera nan nanishi ta sangra y keda keto cu e speransa cu UPP lo lubida y stop di haci pregunta. Of kizas nan tabata mucho druk den e "wheel & deal" den e proyecto corupto di e expansion/renobacion di HOH?

E dia cu sali na cla cu e corupcion den e proyecto di construccion di hospital resulta di ta evidente (pasobra aki no ta rumores, pero hecho), tur esnan envolvi MESTER ser poni responsabel, y carga e consequencia tambe. Boso a wordo adverti y taha, pero boso a scohe pa sigui cu e proyecto corupto aki.

Pues e flie cu boso no por wordo teni responsabel, bou di e pretexto cu e hecho a socede prome cu boso tempo, lo no subi, pasobra como un bon ciudadano bo mester por para tipo di cosnan asina. Particularmente ora cu e compania cu a haya e proyecto a bid MIYONES di florin MAS HALTO cu e grupo frances.

Biniendo back riba e asunto di e iregularidad di e cobramento di un paar di specialistanan, mester constata cu a trata di tene e investigacion scondi y cu e Hunta di Supervision di HOH, apesar di mester tabata na altura di e investigacion, toch a prefera di keda keto tambe, y hasta a acepta pa nombra un di e specialistanan cu supuestamente ta bou di investigacion, como Director Interino di HOH.

Y esaki a sabiendas cu ya caba tabata tin un director eynan, pero pa motibonan desconoci a wordo kita for di e funcion ey. Ta increibel cu ta kita un yiu di tera, cu tabata haci un tremendo trabou y cu tabata tin e sosten y apoyo di e empleadonan di HOH, y mas aun ta un persona INTACHABEL y RECTO, cu no ta acepta tipo di cosnan asina ey tuma lugar, ta wordo hala un banda pa pone un persona cu ta bou di investigacion.

Esey ta pone nos pensa cu ta pone un hende eynan pa por ta sigur cu e weganan por sigui.
Ta p’esey, den nos opinion, e minister concerni mester tene e honor na su mes y retira.
Pero nos sa cu tanten cu su amo Mike E. no bise haci esey, e lo no haciele.
Pero e personanan cu ta forma parti di e Hunta di Supervision, cu nos ta sopone cu no ta wordo guia ni door di Mike E., ni door di Alex S., sigur mester tene e honor na nan mes y retira, ya cu nan a nombra un persona cu ta bou di investigacion y nan DELIBERADAMENTE kier a tene esaki secreto.

Ta na varios ocasion nan por a sali papia entorno esaki, pero a scohe pa no papia e berdad. Y awor cu AZV publicamente a admiti cu tin un investigacion andando, cualkier hende cu ta respeta su mes y cu ta considera su mes un hende drechi, apesar cu e ta complice, mester entrega su retiro.
Nan no tin otro "way out".

Mi ta spera cu e sindicato di hospital ABV lo join UPP den denuncia e falta di transparencia di parti di minister y sigur di e Hunta di Supervision y exigi na retiro.

Den nomber di Union Patriotico Progresista – U.P.P.
Candelario – Booshi – Wever
Brazil, october 29, 2014

Expresionnan haci den e articulo aki no necesariamente ta refleha opinion di ArenaPoliti.co