Ta hopi aspectonan importante a keda discuti siman pasa durante e conferencia ‘Green Aruba - Where Europe Meets the Americas’ cu a tuma luga 22 pa 25 di october ultimo den Renaissance Convention Center.

Rector Glenn Thodé a anuncia cu Universdad di Aruba ta bay ricibi diestres miyon Euro for di European Development Fund pa desaroya un facultad nobo. Den entrevista cu Dr. Thode a duna na final di e prome dia di e conferencia, el a informa cu e "e placa ainda no ta riba nos cuenta, pero nos a haya palabra cu nos plannan ta bini na remarca pa financiamento. E placa ta bini cu cierto condicionnan, cualnan nos lo mantene nos mes na nan."

Thodé tambe a presenta den ‘Green Conference’, unda riba e di dos dia el a presenta e vision di e Green Faculty na e audiencia.

Riba e dia aki el a wordo compaña pa Patrick Arens, director comercial di Universidad, kende tambe a duna su banda den e splicacion. "Cada biaha nos ta wordo aserca cu e pregunta riba e curso- y programanan riba tereno di tecnologia y durabilidad. Nos a bay evalua kico nos por haci y a yega na tres opcion. E tresnan aki ta loke nos ta bay ofrece den e Green Faculty."

Pa haci’e mas atractivo posibel, Universidad di Aruba ta pensa riba programanan cortico den forma di "summer- & Winter Schools". "Eseynan ta dirigi riba gruponan special, manera por ehempel gerencia di WEB kier siña anda cu tecnologia nobo. Nos ta organisa e ora un programa di un par di siman y ta ofrece esaki, a cambio di tarifanan comercial. E intencion ta cu interesadonan di henter e area di Caribe ta participa na e programanan aki."

E di dos parti di e facultad nobo ta dirigi riba profesionalnan hopi studia, cu ta traha den sector tecnico. "Nos ta ofrece curso- y trainingnan cu cual nan por mantene nan conocemento y abilidadnan na nivel. Un forma di educacion permanente," segun Arens.

Tambe Green Faculty ta ofrece estudio normal di bachelor den tecnologia duradero. Cu esaki ta traha cu un cantidad grandi di universidadnan, entre otro University of South Carolina y Universty College Utrecht. "E prome dos añanan basico ta wordo duna aki y despues e estudio por wordo sigui cerca un di nos partnernan," Thodé  a splica. El a splica cu Universidad di Aruba kier crea un red di conocemento cu enfasis riba durabilidad. 

Universidad-, Gobierno- y empresanan ta dispone di hopi informacion y conocemento. Cada organisacion tin su limitacionnan riba e tereno aki. Si nos trece tur e informacionnan aki hunto y pone nan disponibel na  partnernan participante, nan tin acceso na tur e informacionnan. Ora cu decisionnan wordo tuma, por investiga bon cual ta e diferencianan pa e diferente escogencianan. Asina e organisacionnan por haci nan huiswerk y ta surgi miho solucionnan. Esey ta uzo duradero di informacion."

Nan a splica cu e red di conocemento aki ta importante pa e Fondo di Desaroyo Europeo. "Union Europeo ta busca proyectonan cu un componente Europeo y un funcion regional, cu ta contribui na durabilidad. Nos ta comparti completamente e vision y pesey nos ta bau desaroya e red di conocemento duradero. Den e proximo aña y mey e proyecto di Green Faculty ta wordo hinca den otro y si e placa bira disponibel pa inicio di 2016, nos ta cla pa cuminsa," Thode a bisa.

Expresionnan haci den e articulo aki no necesariamente ta refleha opinion di ArenaPoliti.co