Recientemente nos por a tuma nota di un declaracion haci door di AZV cu en berdad, manera denuncia pa lunanan largo caba door di UPP, tin un compania estableci na Corsow, esta Forensic and Compliance Services NV, lo ta haciendo un investigacion di posibel iregularidadnan cometi riba tereno administrativo di parti di specialistanan medico cu ta traha den sala di operacion di hospital. Vocero di AZV a laga sa cu aki ta trata di un investigacion na unda 10 specialista ta involucra, manera UPP ya caba a notifica nos pueblo, tambe un ciruhano cu despues hasta a haña un ‘recompensa’ di Raad van Toezicht y Raad van Bestuur cu su nombracion como director medico interino.

UPP ta sali for di punto di bista cu mester warda e resultado di e investigacion. Obviamente e investigacion lo mester bay comproba inocencia of culpabilidad di un of mas di e 10 specialistanan, pero con por ta posibel cu un persona cu ta wordo sospecha di a comete iregularidadnan riba nivel administrativo, por wordo apunta pa tuma e timon over di e mes un hospital na unda e presunto actonan di iregularidad a tuma lugar? No ta asina cu ya caba e tabata eherce e funcion di director medico, no ta e a wordo apunta door di Raad van Toezicht pa fungi como director interino a sabiendas cu AZV lo a start cu e investigacion? Con un minister cu aparentemente a wordo poni na altura cu dicho investigacion lo bai wordo haci, por a tolera cu dicho specialista a ser apunta como tal?

UPP ta bolbe insisti cu un persona honesto y corecto no lo por nunca acepta di ta forma parti di un decision descabeya asina, y consecuentemente lo mester tene honor na su mes y tuma su retiro. Esaki ta conta sigur pa e Raad van Toezicht, pero no ban lubida e rol cu e director financiero a hunga den esaki.

Den nos concepto e director financiero mester wordo retira, pasobra e ta esun cu a conseha e Raad van Toezicht deliberadamente robes den e caso aki. Di mes caba hospital ta den un luz negativo, y falta di transparencia lo tin como consecuencia cu e desconfiansa den nos salubridad lo bira mas pio ainda. Y esaki ta conta sigur tambe pa e minister cu supuestamente tabata sa di esaki; e tambe mester tene honor na su mes y retira.

Den nomber di Union Patriotico Progresista – U.P.P.
Candelario – Booshi – Wever
Brazil, november 6, 2014

Expresionnan haci den e articulo aki no necesariamente ta refleha opinion di ArenaPoliti.co