No tin diferencia den mentalidad di Mike Eman y Rudy Lampe, ya cu tur dos ta e mesun gañador y manipulador, organisa y structura. Lider di RED, Rudy Lampe a sostene AVP den oposicion di 2005-2009 den tur e weganan den Parlamento contra MEP y na dos ocasion pueblo a rechaza su persona, pasobra e no ta sirbi ni como pastoor corda como politico. Kende no ta corda Rudy Lampe cu tabata yama tur politico pa sinberguensa, pasobra tin parlamentario cu lo a cobra ‘overbruggingstoelage’. Sinembargo ora pueblo a core cu ne, e mes sin ningun tiki di berguensa tambe a bay cobr’e. Kende no ta corda con na 2007-2008 e persona aki den oposicion a opone cualkier acuerdo cu Petrobras pa e refineria, gañando y instigando e trahadornan cu si Petrobras cumpra e refineria, tur e salarionan lo baha y cual tabata un mentira flagrante, mescos cu su otro mentira cu Petro China lo bin cu 600 Chines pa traha den e refineria.

NO compara AVP cu MEP
Despues di un ausencia di 6 aña for di politica, ata Rudy Lampe durante un entrevista na radio ta ataca ex-lider di MEP, sr. Nelson Oduber cu un hala di calumnia y mentira. Cu MEP lo a hiba un maneho mescos cu AVP, lubidando cu gobierno di MEP na 2008 hasta tabata tin un Surplus den begroting di 51.4 miyon florin y si Hulanda y Valero no a haci wega na 2009, lo nos mester a cobra di Valero  e suma di 278 miyon florin y 250 miyon florin di Plant N.V. MEP a haya nos pais na 2001 cu apenas 653.6 miyon florin na reserva di divisa y nos a laga Aruba na 2009 cu 1475 miyon florin na divisa cu ta un crecemento di 821 miyon florin, esta un crecemento di 125%. Tin rapportnan di elogio di IMF, Fitch, Standard & Poor’s, reaccion di Secretario di Estado Hulandes cu a bisa cu nos tabata financieramente riba bon caminda y nos tabata goza di un rating di A-. Cu tabata tin problema tabata pa circumstancianan fuera di nos alcance, pero hamas manera cu AVP a hiba su maneho financiero y a degrada nos rating te na BBB-.
Rudy Lampe: No bisa cu nos lo a crece e debe cu 2 biyon florin y cu e debe tabata mas cu 50% di nos GDP, cu bo mes sa cu bo ta gaña atrobe. Por fabor, no compara AVP cu MEP, pero compara bo partido fracasa RED cu AVP! Si bo tabata asina bon cono politico, di con nunca bo a haya miles y miles di voto y asina keda den politica?

Mas mentira di Rudy Lampe
Encuanto e Conferencia di Mesa Rondo na Curacao dia 26 di November 2005, nos punto di salida tabata cu ta Curacao, Sint Maarten a pidi Status Aparte y ta Bonaire, Saba y Sint Eustatius a pidi pa keda directamente bao di Hulanda y cu Aruba ta respeta y sostene nan deseonan. Cu lo a nenga Rudy Lampe pa papia ta un otro mentira atrobe. Cu e lo a pidi pa CFT, un biaha mas e ta gaña, pasobra ta despues di 2010 cu Hulanda a cumbini pa paga e debenan di Antiyas, anto nan como islanan a bay di acuerdo cu Hulanda lo bin controla e parti financiero y esaki no a ser discuti mes dia 26 di November 2005 durante di e Conferencia di Mesa Rondo na Curacao. Atrobe Rudy Lampe ta gaña, mescos cu Mike Eman. Nan dos ta mescos!
MEP semper a bisa – a base di articulo 36 y 38 di Statuut - nos ta dispuesto pa unda e interesnan ta comun, nos tur ta yuda otro y traha hunto, pero respetando nos Status Aparte. No tabata tin motibo tampoco pa interveni financieramente, ya cu nunca nos a yega di pidi Hulanda placa. Nada di amplia art. 3 di Statuut, pero cooperacion a base di articulo 38 di Statuut.
Rudy Lampe su odio y venganza contra Nelson Oduber no conoce limite. Despues di 6 aña den coma politico, ainda e kier colga na su bachi pa trata na haya un paar di voto pa su partido RED.

Expresionnan haci den e articulo aki no necesariamente ta refleha opinion di ArenaPoliti.co