Despues di e accionnan durante e Augustus Scur (10 pa 19 di augustus 1977), porfin Hulanda a dicidi di duna atencion na e lucha di e pueblo Arubano pa su libertad, su Status Aparte. E accionnnan tabata e ultimo recurso cu e pueblo Arubano tabata tin pa demostra su frustracion, disgusto y desaprobacion pa cu e formacion di Gobierno Central lagando e partido mayoritario MEP afor y e actitud negativo di Hulanda pa cu e deseo di e pueblo Arubano pa su Status Aparte.

Hulanda a habri porta
Despues cu Bestuurscollege a haya noticia for di Hulanda cu Gobierno Hulandes ta dispuesto pa ricibi un delegacion Arubano pa papia tocante e futuro estatal di Aruba, un reunion di Eilandsraad a wordo convoca riba 19 di augustus 1977. Riba e mesun fecha aki Bestuurscollege a ricibi un telegram for di Prome Ministro Hulandes Joop den Uyl confirmando e hecho cu Gobierno Hulandes lo ricibi un delegacion Arubano. Durante e reunion aki un mocion entrega door di partido MEP a wordo aproba unanimamente. Den curso di e reunion aki tambe varios miembro a haci uso di e oportunidad pa expresa nan disgusto pa e manera humiliante den cual e pueblo di Aruba a wordo trata door di e Riot Comando manda for di Corsou. E comportacion bruto y falta di respet pa parti di e agentenan di e Riot Comando, incluyendo e tiramento riba ciudadanonan inocente y sin arma indudablemente a contribui tambe na e cambio den e actitud di parti di Hulanda pa cu e deseo ferviente di e pueblo Arubano pa su libertad.

Miembronan di delegacion
En todo caso, cumpliendo cu e mocion di Eilandsraad, Bestuurscollege a forma un delegacion pa bay delibera cu Gobierno Hulandes y e siguiente integrantenan a keda nombra: G.F. (Betico) Croes, lider di e delegacion; miembronan di Eilandsraad D. Leo, G. Bareño, C. Lacle, P. Kelly, R. Richardson, W. Vos y S. Spanner. Como conseheronan a wordo nombra diputado J. v/d Kuyp y e siguiente representantenan di e sindicatonan Arubano: J. Quijada (GWU), M. Malmberg (ANAAB), R. Hoek (UPA), S. Harms (UEA) y M. Croes (VWA). Otro conseheronan como representantenan di comercio y industria: M. de Cuba (ATSA), E. Arends y M. Roos (Camara di Comercio), D. Mansur, H. Timmer y M. Kuiperi (ATIA). Como secretario di e delegacion: J. Wever. Hecho ta cu ta danki na e vision y determinacion di nos Libertador Betico Croes nos pais por a conoce un union asina grandi y historico den e delegacion amplio aki.

Viahe di delegacion pa Hulanda
E delegacion a viaha pa Hulanda riba e dianan 3 y 4 di September 1977 den dos grupo y a regresa riba 16 di September 1977. Na Hulanda e miembronan di e delegacion a delibera tocante e futuro estatal di Aruba cu representantenan di Gobierno Hulandes, partidonan politico, sindicatonan y organisacionnan di dunador di trabao. Sin duda cu e viahe aki a resulta den un exito rotundo, ya cu Gobierno Hulandes porfin a tuma e lucha di e pueblo Arubano na serio y a cuminsa coopera pa yega na concretisa e deseo di e pueblo Arubano, esta nos Status Aparte entrante 1 di januari 1986.
Esaki ta parti di e historia di un pueblo uni pa kibra e cadena di esclavitud di 12-8 y logra e Status Aparte tan anhela, pero cu awe precisamente 1 siman pasa e logro aki a ser traiciona den Sala di Parlamento door di entrega di nos autonomia financiero na Hulanda di parti di esnan cu nunca a lucha pa logra e ideal aki.

Expresionnan haci den e articulo aki no necesariamente ta refleha opinion di ArenaPoliti.co