Nos cultura, Nos prioridad. 

Diaranson mainta Minister Otmar Oduber a presenta oficialmente e maneho cultural yama Excelencia Cultural na tur e stakeholders di cultura na Aruba.

E mandatario ta comenta cu e ta un trabou di un aña y mey, di consulta den e area di cultura di aki na Aruba.  Ainda por ta corda e Cumbre Nacional di Cultura cu a hala hopi atencion di nos comunidad unda a hiba e discusion di con lo structura e maneho di cultura pa futuro. Despues di e Cumbre aki tabata tin diferente reunion y discusion cu varios gruponan di enfoke. Minsiter Oduber ta splica: "Esaki pa por a piki e pensamento di no solamente e sector publico, cu ta encarga cu e aspecto aki, pero di e sector priva tambe cu tin un rol hopi importante pa por carga e maneho cultural aki den futuro y logra tambe pa duna e sosten necesario cu e puntonan cu a bin dilanti den e cumbre."

Den e cumbre a identifica 12 prioridad. Sr. Oduber ta bisa: "E tabata un escogencia di traha un documento completamente nobo a base di tur e investigacionnan cu a tuma luga den pasado caba, of crea un plan di maneho cu ta  identifica e puntonan cu nos ta bay dedica riba dje. A prefera pa scoge un plan di maneho den e area di cultura, tumando den consideracion e investigacionnan cu a haci den pasado y a pone e 12 puntonan den un documento cu awor ta entrega na cada un di e stakeholders cu ta traha directamente cu Gobierno."

Sr. Oduber ta sigui bisa: "For di e Ministerio di Cultura nos a pone diferente enfoke nos dilanti pa loke ta trata cultura. E puntonan ta entre otro pa infiltra cultura den nos educacion, pa demostra e sinergia di cultura cu nos pilar economico cu ta turismo y a identifica San Nicolas como e capital pa locual ta trata herencia cultural di Aruba." Por agrega cu di parti Ministerio di Cultura a percura tambe pa duna un guia artistanan mas concentra di ta un propio empresario riba nan mes, pa compronde cuanto posibilidad tin eyfo local y internacional. Esaki pa yuda esunnan cu ta den e sector aki trece nan producto padilanti y conserva esaki dunando e balor cu e mester tin.

E relacion entre e sector priva y sector publico ta keda determinante. E mandatario ta sigui splica: "Bo por tin e miho motivacion cu ta posibel, pero si sector priva no carga esaki, pa por transporte den tempo, pero tambe pa dune contenido, e por bira un tarea sumamente dificil."

Minister Oduber ta bisa: "Aspira atravez di inspiracion, yega mas leu dor di tin un motivacion grandi. Esaki ta enfokenan cu Ministerio a pone padilanti pa bisa cu nos kier yega na e ambiente di tin un Excelencia den e area Cultural."

E maneho di cultural aki ta tambe accesibel pa tur hende riba e pagina web www.cultura.aw unda den e forma aki tur hende tanto sector publico como sector priva tin acceso na e informacion y tin un enfoke cla riba e ruta y e maneho cu tin pa futuro di cultura di Aruba.

Expresionnan haci den e articulo aki no necesariamente ta refleha opinion di ArenaPoliti.co