Den e ley di Supervision Financiero no tin niun medida. Minister di finansa, un di e expertonan financiero mas reconoci, a splica esey bon cla. E lider di PDR, Andin Bikker mes a confirma publicamente cu e ley NO TIN MEDIDA. AVP a reta oposicion pa mustra unda den e ley tin medida. Niun por a mustra esey. Awor MEP ta busca forma pa tapa nan gañamento. PDR ta busca forma pa scapa cara. E realidad ta cu a purba GAÑA y SPANTA trahadornan, sindicatonan y pueblo cu un mentira flagrante pa lanta pueblo. E mentira, mescos cu tur mentira, a sali na cla!

REDUCI DEFICIT
Awor MEP y PDR kier bisa cu e medidanan no ta den e ley mes, pero den e maneho di reduci deficit. E realidad ta cu for di dos aña pasa gobierno ta den proceso pa reduci e deficit den presupuesto sin tuma medida. E deficit a subi aña pasa te 9.4%. Pero ni CFT, ni Hulanda, ni MEP y PDR  kier reconoce cu e unico motibo cu e deficit tabata asina halto na 2014, ta pasobra a dicidi di pone e cobertura di e fondo di pensioen APFA bek na 100% di biaha. Esey ta splica cu pa 2015 e deficit a bolbe baha te na 3.7%. Den un aña di tempo a baha e deficit cu cas 6%. No cu medida manera MEP y PDR ta bisa, pero cu maneho di baha gasto sin pone esaki riba lomba di pueblo. Ta haci esaki door di corta gato den aparato di gobierno mes of hisa entrada di gobierno. E maneho cu gobierno tin cu sigui ta di reduci e gastonan den un forma gradual pa limita e consecuencianan indesea. Den cuadro di e maneho aki gobierno mes a propone un serie di accion. E lista di proposicionnan aki no ta nada nobo. Nan ta conoci for di 2014 y ta poni den e cuadro financiero 2014-2017 cu a wordo trata y aproba na fin di 2014. E cuadro financiero a wordo publica tur caminda y parti di e accionnan cu gobierno mes a propone a wordo ehecuta caba. Mas cu 9 luna prome cu e ley di Supervision Financiero cu a wordo trata siman pasa. Kier men cu ta nada nobo. Ta esakinan ta loke MEP ta bisa cu ta medida cu ta bin cu e ley di Supervision Financiero.

BAZV
E lider di PDR tambe a bisa cu e BAZV cu a wordo introduci aña pasa y a wordo aumenta e aña aki ta un di e medidanan cu ta resultado di e ley di Supervision. E splicacion aki a straña nos masha hopi. No solamente pasobra e BAZV a drenta na vigor hopi prome cu e ley di Supervision y pasobra cu tur e placa di BAZV ta bay directamente pa cubri e gastonan medico aki na Aruba y den exterior di tur hende na Aruba. Pero mas ainda pasobra trahadornan di Aruba ta paga awe menos pa nan seguro medico (AZV), pero a keda cu e mes un servicio di seguro medico pa e trahado y henter su famia. E prima cu e trahado ta paga a baha di  2% pa1% for di 1 di juli e aña aki. Y enbez di cu e dunadornan di trabao y 60 mil trahado ta paga pa e seguro medico pa tur hende aki na Aruba, awor ta 1.2 miyon hende ta paga esaki via e BAZV. Kier men cu HOPI mas hende ta paga pa cubri e mes un gastonan di cuido medico. Esaki kier men cu nos tur ta paga menos. Anto esaki ta wordo yama un medida segun PDR ! Awor paga menos pa e mes in cuido, tambe ta un medida! Obiviamente oposicion no tin forma pa tapa e gañamento y ta sigui inventa e tipo di argumentonan fofo aki.

Expresionnan haci den e articulo aki no necesariamente ta refleha opinion di ArenaPoliti.co