E partidonan D66 y CDA ta sigui cuestiona e mal maneho di gobierno Hulandes den su relacion cu paisnan di Reino den Caribe. En especial sra. Wassila Hachchi di e partido D66 ta sigui cuestiona e maneho di e minister Plasterk. Sra. Hachchi ta haya cu e minister mester concentra riba e contenido di e temanan enbez di crea conflicto cu tur e paisnan. Sra Hachchi a duna minister Plasterk e nomber di "minister di PLEITONAN di Reino". Su titulo normal ta "minister di Asuntonan di Reino. Sra Hachchi y un cantidad creciente di politiconan Hulandes DEN Eerste y Tweede Kamer ta haya cu e maneho di relacionnan di Reino ta bayendo malo. Nan kier preveni cu cosnan sigui bay malo manera a sososde specialmente e aña aki. Nan tampoco ta haya cu Hulanda mester mete den asuntonan autonomo di e paisnan di Reino den Caribe. Ta pa e motibo aki e partidonan di oposicion D66 y CDA a pidi y bolbe urgi pa gobierno di Reino pidi Raad van State pa duna un conseho riba tur e "KB-nan" cu bou di e gobiernon actual di VVD y PvdA a impone via gobernadornan y asina a interveni den asuntonan autonomo di e paisnan. Nan kier pa expertonan independiente duna nan conseho riba e legalidad di e "KB" cu a impone riba gobernador di Aruba.

CORTE CONSTITUCIONAL
Reino Hulandes no conoce un corte constiucional cu ta controla y huzga si leynan y desicionnan di e gobiernonan di e paisnan di Reino ta cumpli cu Statuut y Constitucion di e paisnan. E partido D66 ta di acuerdo cu e urgencia di Aruba pa crea un sorto di "corte constitucional" pa Reino. E Corte aki lo mester evalua desicionnan manera esunnan cu gobierno di Reino a tuma den e conflicto riba presupuesto di Aruba. Pero te awor e gobierno di Reino a nenga di crea e corte special aki siendo cu Statuut mes ta duna espacio pe. Na 2010 parlamentarionan di AVP sr. Juan David Yrausquin y Rene Herde' a entrega un mocion den 2de Kamer di Hulanda cu a wordo adopta door di 2de Kamer. Den e mocion aki a pidi pa crea e "geschillenregeling" cu por haya e forma di un corte constitucional. E mocion aki ainda no a wordo ehecuta door di gobierno di Reino. Algun siman pasa sra. Wassila Hachchi di D66 a pone asina hopi precion riba minister Plasterk cu e minister a duna su palabra cu prome cu april 2015 e lo tene consulta cu e paisnan Aruba, Corsow y Sint Maarten y presenta un proposicion concreto pa crea e "corte" special pa asuntonan constitucional den Reino. Algun luna pasa Presidente di Corte Comun di Husticia di Aruba, Corsow y Sint Maarten a declara cu ta haci falta di un "corte" special asina y cu Corte Comun di Husticia lo kier haya e funcion aki. Na augustus e aña aki e parlamentonan di e tres paisnan Aruba, Corsow y Sint Maarten hunto a para pa e creasion di e "geschillenregeling" aki. E partidonan MEP y PDR ta e unico partidonan den e tres paisnan cu a scohe pa keda para na banda.

Expresionnan haci den e articulo aki no necesariamente ta refleha opinion di ArenaPoliti.co