E accidente diasabra atardi cu e auto di Marlon Sneek tabata motibo pa partido MEP organisa un fiesta. Te ora a bin compronde cu no ta Marlon mes tabata tras di stuur. Den nan rabia y frustracion pasobra no tabata Marlon cu tabata stuur, e agitadornan di MEP a dicidi di lastra Marlon y su primo. Kico nan kier a logra? saca nan frustracion of purba baha Marlon na nan nivel? Hasta e lider di MEP a dicidi di participa den e fiesta cu a caba prome cu ela cuminsa. E lider a scirbi: "Mi conseho na bo: no fia primo di Marlon bo auto". E no por a risisti e tentacion. Anto e ta lider di e partido!

Lamentabel pa MEP y su lider. Marlon a cambia e situacion di accidente y rabia, den uno ejemplar. Marlon a bolbe bek na e luga di e accidente, papia cu e famia di e cas y regla pa drecha e daño cu a causa cu e accidente. E comportacion di Marlon ta ejemplar, pasobra ta asina nos mester actua. Semper. Tambe ora niun hende ta wak ! Mare e miembronan di MEP cu tabata envolvi den accidente por siña pa e siguiente biaha.

Realidad ta cu niun hende ta perfecto. Sea cu nos mes ta comete erornan of nos ta haya nos envolvi den un problema. Esey por sosode cu cualkier hende. Nos no ta tuma niun hende na malo cu nan ta envolvi den un accidente. Sigur ora bo no a ocasion'e. Pesey tampoco ta acusa e miembronan di MEP cu tabata envolvi den accidente of den cualkier situacion fastioso. E por sosode cu nos tur. Loke si ta tuma e miembronan di parlamento di MEP na malo, ta cu enbez di keda na e sitio di e accidente, cada biaha di nobo e miembro di MEP ta core bay sconde. Enbez di keda pa e sitio y asumi responsabilidad segun ley, nan a core bay cada biaha. E ehempel di Marlon Sneek ta e comportacion corecto y ta muestra di e sentido di responsabilidad cu pueblo ta spera di un politico y cu nos, su amigonan, sa cu e tin. Mescos cu Marlon a haci, nos tur por haci: scohe pa haci lo corecto den tur situacion, tambe ora niun hende ta wak!

Expresionnan haci den e articulo aki no necesariamente ta refleha opinion di ArenaPoliti.co