Cosnan y tempo di berdad a cambia. Tawatin un tempo cu trankilidad tawata reina riba nos pais y leu a leu bo ta tende cu un actividad criminal a tuma lugar pasobra di berdad un control mas estricto y un maneho optimal tawata existi. Antes e sentimento di ta sigur tawata lagabo sinti asina comodo unda cubo ta sin ningun tipo di preocupacion. Hasta bo lo por a drumi mes cubo bentanan habri sin cu bo lo core riesgo di wordo ataca. Ultimo tempo casonan di criminalidad a aumenta asina hopi cu e la para bira un epidemia cu aparentemente no tin un cura bou mando di Minister Dowers! Pa con duro e por sona e ola di criminalidad ta CREANDO un Aruba mas "UNSAFE"! Kiko ta nos realidad awor? E ta tristo pa bisa cu ni nabo cas bo ta safe mas, bo no por keiro mas, bo no por laga bo auto un rato pafor, bo no por bishita ATM trankil mas sin sinti cubo ta wordo vigila. Bo porta di cura mester ta sera manera un KIA henter dia. Ta parce cu mientras nos pais ta wordo suta pa criminalidad Minister di husticia ta drumi!

Luna di oktober a wordo sacudi for di su comienso cu actividadnan criminal. Entre e fechanan 16-25 oktober no ta pasa ni un dia cubo ta mira e "headlines" raportando criminalidad y ladronicia. Asina poco poco nos pueblo di Aruba ta perdiendo nos paz y trankilidad. Pa Pueblo ta reina e tristo realidad cu ARUBA no ta "SAFE" mas. No mucho dia pasa un mama huntu cu su jiu homber cu recien a yega cas a wordo sigui y na su porta di cura a wordo ataka door di anti-socialnan cu arma blanco. Riba e videonan cu a circula riba medianan social pueblo por a nota con e atake a wordo planea y e mal intencion cu e anti-socialnan aki tawatin. Cu otro palabra ni nabo cas bo ta safe mas! Tambe e casonan di ladronicia ta para bira un custumber y casi normal. Algo cu ta di condena pasobra nos pais no tawata asina. Mescos ta un otro caso unda un conocido locutor a bira victima di un robo cu ta duna e impreshon di a wordo orkestra pasobra a sigui e locutor a loer e y a bai cu su placa! Pa corona e obra despues cu den area turistico a atraca un joyeria no mucho tempo atras a toca turno pa un casino wordo atraca! For di medionan nos por a compronde cu e 3 anti-socialnan fuertemente arma a drenta e lugar, mara esnan presente, y bay cu un suma grandi di placa. Kiko lo bai hasi pa minimalisa atraco?

E realidad ta cu e Aruba di actual no ta e Aruba di antes mas. Pueblo ta puntra ta kiko e Minister lo bai hasi pa controla e situacionan aki y trece "peace of mind" bek pa tur cuidadano? Acaso e cos mester bai asina leu te ora un cuidadano tuma husticia den su man? Lanta ariba Minister! E pueblo tin miedo pasobra como cuidadano bo no por sali mas, bo no por baha for di auto un rato lage sendi mas pasobra nan lo bai cune, bo no ta safe mas den bo propio cura of cas, bo no por shop sin wordo persigui, bo no por lanta placa pasobra ta atracabo. Pa corona e obra ni den area di hotel bo ta sigur mas pasobra ta tira atraco arma unda cubo bida ta core peliger. Un cos ta sigur pueblo no por continua ta victima di actividadnan criminalidad y ladronicia mas! Cosnan no por sigui asina, algo mester sosode mas pronto cu ta posibel promer cu bida di hende inocente wordo ranca sin cu ta necesario. Un pais no por wordo suta ferozmente pa criminalidad mientras e Minister di husticia mes ta sigui drumi!

Expresionnan haci den e articulo aki no necesariamente ta refleha opinion di ArenaPoliti.co